Ezemplu, hanesan jogu eletróniku ka E-sport ne’ebé sira nia federasaun internasionál mak selu ba partisipa iha Sea Games, iha ema na’in 21. Federasaun Soft Tenis mós iha ninia federasaun internasionál mak selu, Timor-Leste iha atleta na’in lima mak hetan bolsu estudu rasik mai husi komité olimpiku internasionál.
“Partisipasaun Timor-Leste iha Sea Games kompostu hosi Feto na’in 15, inklui atleta no mós ofisiais mai hosi Federasaun Taekwondo, Atletizmu no Badminton. Durante atleta sira nia viajen no partisipasaun iha Sea Games Kambódia, kada atleta iha direitu ba remunerasaun ka osan ba bolsu (Uang Saku) tuir montante orsamentu ne’ebé CONTL hetan hosi governu. Ita nia atleta sira mínimu liu $46 loron ida. Depende ba sira nia loron jogu, balun jogu remata sira fila ona, balun sei joga to’o 17 Maiu mak remata,” Laurentino Guterres hateten iha Palásiu Prezidensiál Nicolau Lobato Bairru-Pité, Tersa (02/05/2023).
Laurentino Guterres iha esperansa boot ba atleta feto potensiál sira tanba atleta Taekwondo hatudu ona prestasaun iha jogu Sea Games iha Filipina tinan 2018.
Atleta sira ne’ebé atu dezloka ba Kambódia maiória hetan ona osan ne’ebé governu aloka ona, tanba bazeia ba sira nia loron ne’ebé hela durante iha Kambódia.
Kona-bá preparasaun atleta sira nian durante iha kazerna, Prezidente Konfederasaun Desportu Timor-Leste (CDTL), Macario F. Sanches hateten, CDTL hetan alokasaun orsamentu $82.000 hosi governu liu hosi Sekretáriu Estadu Juventude no Desportu (SEJD).
Advertisement
Ho kondisaun real orsamentu ba hahán iha $49.000 ne’ebé fahe ba atleta tomak no restu hosi ne’e ba preparasaunnian, hola ekipamentu, farda no nesésidade seluk ba atleta no treinadór durante preparasaun.
“Liu hosi prosesu bá sistema aprovizionamentu ita hetan kompañia ne’ebé fornese, hosi ema ida hetan másimu liu $18,70 sentavus ba loron ida tomak,” Macario F. Sanches hateten.
Xefe Estadu Husu Atleta Sira Disiplina
Prezidente Repúblika (PR), José Ramos-Horta husu ba atleta no ofisiál sira ne’ebé sei reprezenta Timor-Leste iha jogu Sea Games Kambódia tenke hatudu hahalok di’ak, disiplina hodi hamorin Timor-Leste nia naran iha mundu.
“Parabens ba Partisipasaun kontijente Timor-Leste nian iha Sea Games Kambódia, ba ita bo’ot atleta sira, ita boot sira lori prémiu mai di’ak liu tán, la lori la’ós problema, importante lori mak Timor-Leste nia naran morin iha Sea Games no mundu tanba imi nia komportamentu di’ak, hahalok di’ak,” Ramos-Horta hameno ba atleta sira iha serimónia despedida iha Palásiu Prezidensiál Nicolau Lobato Bairru- Pité, Tersa (02/05/2023).