Kompañia Haksolok Sei Fura Bee Iha Fatuberliu Ho $666.591.79

Hatutan.com, (11 Maiu 2023), Díli—Bee Timor Leste, Empreza Publiku (BTL,E.P) asina akordu ho kompaña Haksolok atu fura bee ba suku Fatuk-ahi, Kaikasa no Klakuk iha postu administrativu Fatuberliu, munisípiu Manufahi ho $666,591.79.

Prezidente Ezekutivu BTL,E.P, Carlos Peloi dos Reis asina akordu ho diretór kompañia Haksolok, Helder Vieira Aniceto atu fura bee iha suku Fatuk-ahi, Kaikasa no Klakuk postu administrativu Fatuberliu, munisípiu Manufahi, iha edifisiu BTL,E.P, Kinta (11/05/2023). Foto/Elio dos Santos da Costa.

Prezidente Ezekutivu BTL,E.P, Carlos Peloi dos Reis esplika, kanalizasaun ba kapital postu administrativu Fatuberliu ho orsamentu millaun $1.5 bá projetu tolu, maibé bá projetu ohin asina akordu ne’e $666.591.79 ne’ebé kompaña sei instala bomba halo kanu transmisaun kilómetru 11.

Lee Mós: MARLVI,Lda Dada Bee-moos Bá Suku Tolu Iha Letefoho Ho $835,054.69

Nia espera katak, iha tempu badak kompaña mobiliza rekursu hanesan bada’en sira, ekipamentu sira atu hahú halo servisu.

“Kada projetu ita promove iha postu sira, ita halo rekrutamentu bá enjeñeiru na’in-rua atu akompaña sira hosi inísiu. Kuandu iha problema ruma ita konsulta no rezolve kedan antes ita avansa b’a konstrusaun hodi evita problema,” Carlos Peloi dos Reis hateten iha edifisiu BTL,E.P, Kaikoli,  Kinta (11/05/2023).

Ekipa infraestrutura sei hala’o vizita regulár kada fulan atu haree progresu sira iha terrenu nune’e mós atu garante kualidade servisu.

Tarjetu ba projetu sira liu hosi kontratu katak iha fulan neen nia laran sira halo, entaun espera iha tinan ida-ne’e remata maioria projetu bele konklui no bele lori bee ba komunidade.

Iha fatin hanesan diretór kompañia Haksolok, Helder Vieira Aniceto hateten, agradese tanba kompaña bele hetan fiar hosi BTL,E.P ba projetu ida-ne’e.

“Konfiansa ne’ebé fó, kompaña Haksolok se halo obra ho kualidade hanesan hakerek ona iha kontratu laran,” Helder Vieira Aniceto hateten.

Kompaña Haksolok halo ona obra bee barak iha Dili no mós iha foho, nune’e la’ós servisu ida ne’ebé todan liu tanba ne’e fiar katak obra sira sei hala’o ho di’ak tuir padraun ne’ebé BTL,E.P rasik fó.

Tuir Bill of Quantity (BoQ) kompaña Haksolok hetan km 35 kobre ba suku tolu, tanba ne’e projetu ne’ebé mak hetan ne’e konstrusaun ida ne’ebé boot, tanba foti bee hosi perfurasaaun depois iha kompaña ida mak sei hatutan fila-fali instalasaun bee ne’e, hodi kanaliza ba populasaun.

Tuir dadus BTL,E.P, uma-ka’in 38.000 iha territóriu Timor Leste mak asesu ona bee ne’ebé agora jere hela.

Jornalista Estajiariu: Lazaro Pereira Quefi