ANPM Simu Ona Rezultadu Prelimináriu Perfurasaun Posu Lafaek

Hatutan.com, (15 Maiu 2023), Díli—Autoridade Nasionál Petroleum no Mineral (ANPM), simu ona rezultadu prelimináriu hosi prosesu perfurasaun ba posu Lafaek no sei sujeita ba teste laboratóriu hodi hatene kualidade no kuantidade hosi mina ne’ebé iha.

Prezidente ANMP, Florentino Mateus Ferreira atualiza rezultadu prelimináriu perfurasaun mina possu Lafaek bá Prezidente Repúblika, José Ramos-Horta iha Palasiu Prezidensiál, Bairru-Pité, Segunda (15/05/2023). Foto/Média PR.

Prezidente ANMP, Florentino Mateus Ferreira atualiza ona rezultadu ne’e bá Prezidente Repúblika, José Ramos-Horta iha Palasiu Prezidensiál, Bairru-Pité, Segunda (15/05/2023).

Lee Mós: Xanana Firme Defende Kadoras Greater Sunrise Mai TL

“ANPM atualiza servisu ligadu ho kampu produsaun posu Lafaek no mós servisu sira seluk ne’ebé iha kona-bá kampu sira seluk ne’ebé atinje ona. Atividade sira ne’ebé iha futuru sei hala’o ho kampu sira seluk. Planu bá Bayu Undan futuru liu-liu ho projetu armajenamentu ba karbonu,” nia hateten.

Timor Leste iha projetu hitu to’o walu mak sei esplora iha rai-maran nian, la’ós de’it iha Suai, Ainaro ho Manufahi maibé sei iha projetu sira seluk tán hanesan iha Vikeke, Manatutu, Lautém, Baukau, Bobonaru, no mós projetu sira seluk ne’ebé sei esplora iha rai maran, signifika sei bele mós fó esperansa ba Timor Leste no fó oportunidade ba Timoroan sira liu-liu parte empregu nian, emprezáriu Timoroan bele partisipa iha indústria petrolifera ida ne’e.

Iha tasi laran mós iha kampu balun tán, alende kampu Greater Sunrise, Timor-Leste iha kampu foun ne’ebé sei mós asina kontratu, fiar katak ho kampu foun sira ne’e bele tau hamutuk neste momentu bele dehan iha projetu hitu to’o walu iha tasi laran ne’ebé tau hamutuk rai maran nian iha 14 to’o 16 projetu.

“ANMP hanesan reguladór ba mineiru nian, ami konsege loke bloku 49 iha Timor-Leste atu bele fó oportunidade ba investimentu sira hosi li’ur bele mai investe iha ita nia bloku sira ne’e, nune’e kona-ba riku soin sira ne’e maneja osan mean, osan mutin, marmer, magnet no riku soin sira ne’ebé durante ne’e ita iha,” nia esplika.

Ekipa ANPM halo ona promosaun balun iha Singapura, semana ida-ne’e halo iha Indonézia, fiar katak iha tempu badak sei asina tán kontratu ba área konstrusaun bele fó oportunidade servisu ba Timoroan sira, bele mós haree atu emprezáriu Timoroan sira ne’e bele hola parte mineiru ne’e.

Iha enkontru ne’e, Prezidente Repúblika José Ramos-Horta interessadu ba servisu balun ne’ebé iha no husu ANPM atu kontinua servisu bele atinji buat sira ne’ebé planeadu ona.

Jornalista: Vito Salvadór