Polítika
Partidu Republikanu Promete Hapara Importasaun Foos
Hatutan.com, (16 Maiu 2023), Díli— Partidu Republikadu (PR), promete atu dezenvolve seitór agrikultura, liuliu investe hodi hasa’e produsaun hare iha rai-laran, nune’e hapara importasaun foos hosi nasaun liur, bainhira hetan fiar hodi kaer ukun durante tinan lima iha governu tuir mai.
Prezidente Partidu Republikanu (PR), João Mariano Saldanha. Foto/PR.
Tuir dadus ne’ebé PR iha katak, Timor-Leste iha natar hektares 75.000, tanba ne’e bainhira kaer ukun iha Governu sei utiliza de’it hektares 40.000 atu hasa’e produsaun hare, hasa’e produsaun foos ho kuntidade ne’ebé boot tebes tanba Timoroan hotu iha agrikultura, moris husi agrikultura to’o mate.
Lee Mós: Infraestrutura Bázika Sai Prioridade CNRT Iha Bobonaro
“Agora daudaun ita produs de’it tonelada rua másimu por ektar. Ita bele hasae to’o tonelada lima pur ektare no 75.000 ektares ne’ebé Timor Leste iha, ita sei hapara importasaun foos iha tinan (5) de’it la’ós lori tinan naruk nia laran,” Prezidente Partidu Republikanu, João Mariano Saldanha promete iha salaun Mahoka, Dili, Tersa (26/05/2023).
PR sei ajuda agrikultór sira hasa’e produsaun hare, hapara importasaun foos iha tinan lima nian laran, hakarak fó kréditu bá agrikultór sira ho funan laiha.
Emprestimu ho funan laiha ne’e atu sira bele ba iha banku selu de’it osan inan depois hala’o atividade tau ema servisu iha seitór agrikultura barak liu tán, hamenus joven sira ba toba iha jardin Portugál nian.
PR sei la haruka ema ba liur atu buka moris ka buka oportunidade ba vida joven, maibé PR husu seitór agrikultura hotu ho tan seitór sira seluk sei loke servisu na Timor oan 60.000 kada tinan.La’ós iha tinan 5 nia laran.
Jornalista Estajiariu: Lazaro Pereira Quefi