Xanana Gusmão Agradese Advogadu Bernard Colaery Ne’ebé Luta Apoia TL Manán Fronteira Marítima

Hatutan.com,  (19 Maiu 2023), Díli—Líder Nasionál no Komandante Em-Xefe das FALINTIL, Kay Rala Xanana Gusmão hasoru-malu hodi fó agradesimentu bá Sidadaun Australianu, Advogadu Bernard Colaery ne’ebé fó apoiu makaas ba Timor-Leste (TL) nia luta hodi manan soberania fronteira marítima ho Austrália.

Líder Nasionál no Komandante Em-Xefe das FALINTIL, Kay Rala Xanana Gusmão hasoru-malu hodi fó agradesimentu bá Sidadaun Australianu, Advogadu Bernard Colaery ne’ebé fó apoiu makaas ba Timor-Leste (TL) nia luta hodi manan soberania fronteira marítima ho Austrália, iha El Legendário, Sesta (19/05/2023). Foto/Eujévio Pereira.

Bernard Colaery iha mós amigu di’ak ida, Steve Bracks ne’ebé mós fó apoiu makas ba Timor nia luta ba soberania fronteira marítima ho Austrália.

Lee Mós: Advogadu Bernard Collaery Nia Kontribuisaun bá Timor-Leste Labele Sura

Steve Bracks mós agora assume hela knaar nu’udár Reprezentante Spesiál Governu Austrália nian ba Negosiasaun  Dezenvolvimentu Greater Sunrise  no Harold Mitchell, Amigu di’ak Timor nian ne’ebé fó apoiu makas ba Timor-Leste luta ba soberania fronteira marítima ho Austrália.

Sorumutu ne’ebé hala’o iha El Legendário, Sesta (19/05/2023) ne’e, nakonu ho ambiente amigável, iha espíritu solidária no kordiál tebes.

“Há’u aproveita sorumutu ne’e, lori povu Timor-Leste nia naran agradese ba amigu di’ak Timor-Leste nian na’in-tolu, ba sira nia dedikasaun, komitmentu no apoiu bá Timor-Leste nia luta ba soberania fronteira marítima ho Austrália,” Kay Rala Xanana Gusmão hateetn iha El Legendário, Lecidere, Díli.

Amigo Timor-Leste nian na’in-tolu ne’e sei simu kondekorasaun ho grau “Ordem de Timor-Leste” ne’ebé sei atribui hosi Prezidente Repúblika, José Ramos-Horta iha selebrasaun loron Restauasaun Independénsia 20 de Maiu 2023, ne’ebé sei hala’o iha Palásiu Nobre Lahane, Sesta (19/05/2023) tuku haat lorokraik.

“Timor-Leste manán ona nia fronteira no kontinua luta hodi dada kadoras Greater Sunrise mai,” Xanana Gusmão hateten.

Iha loron 08 fulan Juñu 2020, Xanana Gusmão hasai deklarasaun hodi apoia makas Advogadu Witness K no Bernad Collaery iha julgamentu ne’ebé hala’o iha Tribunál Austrália too hetan livre, tanba de’it defende Timor-Leste manán soberania tasi hasoru Asutrália.

Jornalista: Vito Salvadór