Tribunál Aplika Prizaun Preventiva Bá Sidadaun Indonézia Ne’ebé Atu Vota Iha Darulete

Hatutan.com, (24 Maiu 2023), Díli—Tribunál Judisiál Primeira Instánsia Díli (TJPID), liuhosi Juiz Álvaro Maria Freitas, iha kuarta 24 maiu tuku 11:30 dadeer Otl, hasai ona despaixu ikus, hodi aplika medida koasaun Prizaun Preventiva bá arguidu ho inisiál VAG hosi Repúblika Indonézia, maibé tenta atu vota iha sentru votasaun EBF Darulete, Postu Administrativu Liquiça-Vila, Domingu (24/05/2023).

Tribunál Judisiál Primeira Instánsia Díli (TJPID), iha kuarta 24 maiu tuku 11:30 dadeer Otl, hasai ona despaixu ikus, hodi aplika medida koasaun Prizaun Preventiva bá arguidu ho inisiál VAG hosi Repúblika Indonézia, no tenta atu vota iha sentru votasaun EBF Darulete, Postu Administrativu Liquiça-Vila, Domingu (24/05/2023). Foto/Elio dos Santos da Costa.

“Despaixu ikus hosi Tribunál, aplika prizaun preventive bá arguidu hanesan sidadaun Indonézia. Entaun, perigu bá fuga. Nune’e bele halo investigasaun hosi Ministériu Públiku ho parte seguransa sira di’ak liu. Ida-ne’e mak husu atu aplika prizaun preventiva,” Advogadu privadu, Marino da Cruz de Jesus hateten iha Tribunál Díli, Kuarta (24/05/2023).

Lee Mós: Julgamentu Bá Sidadaun Indonézia Ne’ebé Atu Vota Iha Darulete, Defeza Husu Aprezentasaun Periódika

Hosi parte defeza haree katak, tuir Lei, advogadu iha prazu atu halo rekursu. Tanba ne’e, bainhira simu ona despaixu, parte defeza sei haree no iha hanoin atu halo rekursu bá despaixu ne’ebé mak Tribunál hatuun ona bá arguidu.

Hatán kona-bá parte defeza aseita ka la’e ho desizaun hosi Tribunál nian, Adovagadu Marino dehan, la aseita, maibé oras ida sei simu despaixu, sei haree didi’ak, haree katak iha posibilidade atu bele halo rekursu.

Iha Tersa (23/05/2023), PNTL liuhosi Departamentu Investigasaun Kriminál (DEP), transporta no submete arguidu VAG bá Tribunál, hodi tuir prosesu primeiru interrogatóriu judisiál.

Durante prosesu primeiru interrogatóriu judisiál ne’e, Ministériu Públiku (MP), liuhosi Prokuradór João Marquês, promove kríme rua, ida maka Fraude Votasaun, temi iha artigu 237 no krime Falsifikasaun Agravada iha artigu 304, hosi Lei Kódigu Penál Timor-Leste.

Ho desizaun hosi Tribunál Dili ne’e, ohin, PNTL transporta kedan arguidu bá kumpri ninia sentesa iha prizaun Becora, Díli.

Audiénsia julgamentu ne’e prezide hosi Advogadu Marino da Cruz de Jesus, Juiz Álvaro Maria Freitas, João Marquês.

Jornalista: Rogério Pereira Cárceres