PD Atu Hola Parte Iha Formasaun Governu Da-sia Depende Bá CNRT

Hatutan.com, (29 Maiu 2023), Dili—Partidu Demokrátiku (PD) atu hola parte iha formasaun Governu da-sia, depende bá Partidu mais votadu, Congresso Nacional Reconstrução Timorense (CNTR) iha eleisaun Parlamentár ne’ebé hala’o iha 21 Maiu 2023.

Sekretáriu Jerál PD, António da Conceição Kalohan. Foto/Hatutan.com

“Ha’u hanoin depende. Sé CNRT ne’ebé hanesan partidu mais votadu konsidera, ne’e kabe bá CNRT,” Sekretáriu Jerál PD, António da Conceição hateten iha Parlamentu Nasionál (PN), Segunda (29/05/2023).

Lee Mós: CNE Konklui Apuramentu Nasionál, Sei Submete Keixa Haat Bá Ministériu Públiku

PD rasik iha ninia mekanizmu rasik atu deside liuhosi enkontru nível superiór partidu ninian, depois ida ne’e maka sei halo fila-fali tán konferénsia nasionál ne’ebé involve mós munisípiu hodi hola desizaun.

Tuir oráriu, iha Segunda 29 Maiu tuku 14:00 lorokraik Otl, PD sei organiza no realiza sorumutu ida entre konsellu superiór sira PD nian hodi deside destinu ruma.

“Hosi ida-ne’e duni maka depois ami bele hola desizaun atu bá CNRT ka bá Plataforma,” nia hateten tán.

Sekretáriu Jerál PD ne’e mós subliña katak, bainhira CNRT hili duni PD atu ukun hamutuk maka, PD sei simu ho responsabilidade no la’ós atu fahe kadeira.

“Ida ne’e maka ami nia objetivu. La’ós mós maka fahe malu kadeira hira ho hira tanba ne’e buat baibain ida. Maibé, ida ne’ebé dehan katak atu hola responsábilidade bá vida nasaun ninian ne’e ita bele halo hamutuk saida. Ida-ne’e mak importante no iha ekipa. La’ós ki’ik ho boot kuandu tama ona bá ukun ne’e, laiha ki’ik ho boot. Iha maka asume responsábilidade ida hamutuk, servísu nu’udár ekipa,” nia hateten.

Rezultadu Apuramentu Nasionál hosi Comissão Nacional de Eleições (CNE) hatudu katak, partidu CNRT hetan kadeira 31, ekivale ho totál votu 288,289, FRETILIN ho kadeira 19 ekivale ho votu 178.338, PD hetan kadeira 6 (totál votu 64.547), Kmanek Haburas Unidade Nasionál Timor Oan (KHUNTO) hetan kadeira 5 (totál votu 52.031) ho Partidu Libertasaun Populár (PLP) ho kadeira 4, hosi totál votu válidu 40.0720.

Tuir oráriu, iha loron 07 fulan-juñu 2023, Tribunál Rekursu (TR) sei fó sai ofisialmente kona-bá rezultadu hosi eleisaun Parlamentár ne’ebé povu Timor-Leste realiza ona iha Domingu (21/05/2023).

Jornalista: Rogério Pereira Cárceres