CFP Hasai Ofísiu Termina Servisu Pesoál Apoiu Gabinete Liña Ministeriál

Hatutan.com, (02 Juñu 2023), Díli- Komisaun Funsaun Públika (CFP, sigla portugés) hasai ona ofísiu ho númeru 313/2023 kona-bá sesasaun ka termina  servisu pesoál (apontamentu politika) sira ne’ebé durante ne’e dezempeña funsaun hanesan funsionáriu ka ajente públiku iha liña ministeriál sira.

Lee Mós : Xefe Estadu Enkoraza KFP Servisu ho Imparsiál

Ofísiu CFP hosi nian. Foto/Repro

“Iha konsiderasaun bá tranzisaun bá IX Governu Konstitusional, ha’u fó-hatene ba Exelénsia sira katak, tuir artigu 69, Dekretu-Lei númeru 27/2016, 29 Juñu, ho redasaun ne’ebé fó hosi Dekretu-Lei númeru 32/2022, loron 19 fulan-Maiu, membru sira husi Gabinete Ministeriál sira nia funsaun sei termina hamutuk ho mandatu membru  Governu sira-nian,” haktuir  Ofísiu CFP nian  ne’ebé Hatuta.com asesu Kinta (01/06/2023).

Iha ofísiu ne’ebé asina hosi prezidente CFP, Faustino Cardoso Gomes, temi mós kona-bá membru sira Gabinete Ministeriál ne’ebé antes ne’e nu’udár funsionáriu públiku tenke halo pedidu bá Komisaun Funsaun Públika atu bele re-integra imediata bá servisu orijinál.

“Tanba ne’e, membru sira hosi Gabinete Ministeriál ne’ebé nu’udár funsionáriu públiku tenke husu Komisaun Funsaun Públiku atu re-integra imediatamente bá servisu orijinál, iha tempu ne’ebé hala’o funsaun sira-ne’e.” Sita hosi karta ofísiu ne’e.

Iha  Sesta, 02 fulan-Juñu 2023, Hatutan.com  hakat bá edifísiu CFP iha Matadoru, Díli hodi  halo konfirmasaun direita ho Prezidente CFP, Faustino Cardoso Gomes, maibé  nia orienta de’it atu haree deit ona ofísiu refere tanba  parte CFP hasai klaru ona no distribui ona bá iha liña ministeriál sira.

Jornalista: Vito Salvadór