Deskonfia Oknum PCIC Baku Membru PNTL Ida To’o Grave

Hatutan.com, (08 Juñu 2023), Díli—Deskonfia onkum ida hosi Policia Ciêntífica Investigação Criminál (PCIC), ho identidade inisial JK “baku” no tuku membru Polísia Nasionál Timor-Leste (PNTL) ida ho inisiál JL to’o kanek grave.

Pessoál Seguransa no media, rekolla hela dadus kona-bá onkum Policia Ciêntífica Investigação Criminál (PCIC) ho identidade inisial JK “baku” membru Polísia Nasionál Timor-Leste (PNTL) ida to’o kanek grave iha arredór otél HK área Hudi Laran, Suku Bairru-Pité, Postu-Administrativu Dom Aleixo, Munisipiu Dili, Kinta (08/06/2023). Foto/PNTL.

Kazu insidente entre membru na’in-rua hosi instituisaun seguransa ne’e akontese iha arredór otél HK ne’ebe lokaliza iha área Hudi Laran, Suku Bairr-Pité, Postu-Administrativu Dom Aleixo, Munisipiu Dili, Kinta (08/06/2023), hale’u tuku-lima (05:00) dadeer madrugada, Otl.

Lee Mós: “Tua-Lanu” Oknum PCIC Hakanek Feto Estranjeira Ida Iha Otél Hongkong

Kronolojia hosi kazu ne’e, inisia liuhosi diskute malu entre oknum PCIC ho inisial JK hasoru  joven ida ho inisiál F, tanba JK deskonfia F hada’u nia namorada ka doben.

“Durante haksesuk malu ne’e, vítima JL nu’udár autoridade seguransa mak kolokadu iha unidade servisu sekreta PNTL ninian, ne’ebé halo hela mós kna’ar vizilánsia iha área ne’ebá. Tanba membru PNTL ne’e haree hela oknum PCIC diskute malu ho joven mane ida seluk ho inisiál F, nune’e JL tenta halo aprosimasaun ho intensaun hakalma sira-nia haksesuk malu ne’e,” Hatutan.com sita komunikadu.

Iha aproximasaun ne’e, JL fó hanoin bá JK ho F katak, hanesan joven nu’udár jerasaun di’ak ida bá futuru RDTL, karik problema ruma koko ko’alia mamar de’it bá malu.

Maske nune’e, oknum PCIC ho inisiál JK rona lia-fuan ne’e sente ofendidu bá ninia an. Nune’e, hakfodak, JK hakat bá tuku vítima JL iha hasan sorin karuk, rezulta bubu no ibun kanek.

Oras-ne’e daudaun vítima JL hala’o hela tratamentu saúde iha Sentru Saúde Vera-Cruz no sei kontinua halo keixa hasoru oknum PCIC bá Esquadra PNTL Comoro hodi kontinua prossesu kriminál.

Molok ne’e, oknum PCIC ne’e komete tiha ona kazu mak hanesan, hasoru membru PNTL ida mós iha Unidade Servisu Informasaun Polísia Nasionál (SIPN), iha área Culuhun.

Kazu seluk maka, baku sidadaun feto oríjen hosi indonézia iha área Bairru-Pité no iha Kinta dadeer madrugada, komete tán aktu ne’ebé hanesan hasoru vítima JL, hanesan membru PNTL ida ne’ebé mak halo hela servisu iha terrenu.

To’o notísia ne’e fó sai, Hatutan.com seidauk halo konfirmasaun kona-bá kazu ne’e ho superiór sira PNTL nian no mós PCIC.

Jornalista: Rogério Pereira Cárceres