Desportu
FIFA Prontu Servisu Hamutuk Ho Governu Foun Dezenvolve Infraestrutura Futeból TL
Hatutan.com, (08 Juñu 2023), Díli—Diretór Membros de Associações Ásia e Oceania hosi Federation Internasionál of Football Association (FIFA), Sanjeevan Balasingam, deklara, FIFA iha kompromisu bo’ot atu tulun dezenvolvimentu futeból iha Timor-Leste (TL) tanba ne’e sei kontinua servisu hamutuk ho governu foun.
Diretór de Membros de Associações Ásia e Oceania, FIFA, Sanjeevan Balasingam ho Chefe de Escritório Regional da FIFA – Kuala Lumpur Lavin Vignesh. J, hasorumalu ho Prezidente Partidu CNRT, Kay Rala Xanana Gusmão no Sekretáriu Jerál, Francisco Kalbuadi Lay iha sede partidu, Bairo dos Grilhos, Kinta (08/06/2023). Foto/Hatutan.com.
“Pontu xave sira hosi enkontru ne’e ami ho señor Xanana Gusmão katak, Governu foun ne’ebé mai sei haree servisu hamutuk ho FFTL no FIFA. Tanba ne’e FIFA mós hakarak dezenvolve infraestrutura Futeból iha nasaun ne’e,” Sanjeevan Balasingam hateten hafoin enkontru ho Prezidente Partidu CNRT, Kay Rala Xanana Gusmão iha sede partidu, Bairo dos Grilhos, Kinta (08/06/2023).
Lee Mós: FFTL simu hosi FIFA-AFC milaun $1, fó de’it $1,000 ba asosiasaun sira
Vizita FIFA nian mai Timor-Leste la’ós ko’alia de’it ho Prezidente FFTL ho nia ekipa, maibé mós lider foun ne’ebé sei kaer governu foun iha nasaun ne’e, tanba FIFA atu dezenvolve Futeból iha nasaun ne’ebé de’it presiza servisu hamutuk ho Governu no mós membru Asosiasaun ne’ebé mak FFTL lidera.
FIFA liu husi FFTL iha Sentru treinamentu ne’ebé sai mós hanesan FIFA nia Head Quartel (HQ) iha Timor-Leste ne’ebé sei hadi’a halo di’ak liután ho fundu hosi FIFA rasik.
Ida seluk maka, FIFA sei halo konstrusaun ba Estádiu Nasionál hanesan passu daruak iha dezenvolvimentu infraestrutura Futeból nian iha Timor-Leste.
Sei haree projetu seluk ne’ebé FIFA iha, mak hanesan Futeból ba eskola, FIFA sei kontaktu ho lider foun hosi Governu foun Timor-Leste no FFTL hodi lansa programa Futeból ba eskola iha nasaun ne’e.
Iha fatin hanesan, Prezidente Partidu CNRT, Kay Rala Xanana Gusmão hateten, reprezentante sira ne’ebé ohin hasoru nia ho Sekretariu Jerál Partidu CNRT, Francisco Kalbuadi Lay mai hosi FIFA.
“Sira mai hasoru malu ona ho Prezidente Federasaun, maibé governu ida-ne’e atu sai no governu foun seidauk tama. Tanba ne’e, enkontru ohin ho reprezentante FIFA ne’e informál hodi rona hosi sira saida maka FIFA halo ona no hakarak halo iha tinan sira mai ne’e,” Kay Rala Xanana Gusmão hateten.
Reprezentante FIFA na’in rua ne’ebé hasoru malu ho Prezidente Partidu CNRT mak hanesan, Diretór de Membros de Associações Ásia e Oceania, FIFA, Sanjeevan Balasingam ho Chefe de Escritório Regional da FIFA – Kuala Lumpur Lavin Vignesh. J.
Jornalista: Vito Salvadór