Prezidente Repúblika José Ramos-Horta Moras

Hatutan.com, (14 Juñu 2023), Díli—Iha loron hirak  ikus ne’e, Tersa-Kuarta (13-14/06/2023), Prezidente Repúblika, José Ramos-Horta, la tama servisu hanesan baibain tanba moras no presiza deskansa uitoan.

Lee Mós : Ramos-Horta Husu CNRT-PD Labele Ukun ho Vingansa

Prezidente Repúblika (PR), José Ramos-Horta. Foto/Elio dos Santos da Costa

Informasaun ne’ebé Hatutan.com  rekolla hosi fonte sira iha Palásiu Prezidensiál katak ajenda lubuk ida Prezidente Repúblika nian iha loron rua ne’e kanseladu hotu tanba Prezidente Repúblika nia kondisaun saúde ladún estavel no presiza deskansa.

Fontes hosi Palásiu Prezidensiál ne’e informa, daudaun ne’e médiku privadu sira organiza hela hodi fó asisténsia médiku bá Prezidente Repúblika atu bele rekupera nia saúde no tuir informasaun médiku sira nian katak, Prezidente Repúblika, José Ramos-Horta parese kolen demais  ho atividade sira durante ne’e.

“Horikalan to’o dadeer ne’e, Prezidente Repúblika iha  hela Díli sidauk dezloka bá Darwin-Austrália, maibé médiku sira sujere atu bele bá halo check-up bá Prezidente Repúblika nia saúde iha ospitál balun iha Darwin-Austrália,” fontes ne’e informa.

Informasaun seluk katak iha Kuarta meiudia ne’e (14/6/2023), hale’u tuku 12:00 Otl, Prezidente Repúblika, José Ramos-Horta, akompaña hosi médiku privadu ida sei dezloka bá Darwin-Austrália, atu bele bá konsulta no halo check-up bá nia saúde.

Iha loron 10 fulan-Juñu 2023, Prezidente Repúblika (PR), José Ramos-Horta,  partisipa iha eventu “Dia de Portugal Camões e Comunidades Portuguesas”, ne’ebé organiza hus embaixada Portugal bá Timor-Leste.

Eventu “Dia de Portugal Camões e Comunidades Portuguesas” realiza iha Munisípiu Baucau, iha Centro Concenção Baucau (CCB), partisipa husi estudante no professores sira CAFE nian no mós sidadaun portugés iha ne’ebé lokaliza iha Timor-Leste.

Jornalista : Vito Salvadór