Alfandega Rekolla Millaun $37-resin Hosi Fronteira

Hatutan.com, (28 Juñu 2023), Díli—Ministériu Finansas (MF) liu hosi Diresaun Jerál Alfandega rekolla reseita millaun $37-resin hosi postu integradu sira iha Fronteira entre Timor-Leste ho Repúblika Indonézia (RI).

Komisáriu Autoridade Aduaneira ka Alfándega, José Abílio. Foto/Hatutan.com

Komisáriu Alfándega, José Abílio informa, totál reseita hirak ne’e rekolla hosi importadór sira durante aplika pagamentu taxa hosi fulan Janeiru to’o 31 Maiu tinan ne’e.

Lee Mós: Alfándega Rekolla Millaun $22,5 Hosi Operasaun Portu Tibar

“Reseitas ne’ebé mak Alfandega rekolla dezde Janeiru to’o 31 Maiu 2023 hamutuk $37.845.426,54. Ne’e reseitas Estadu. Mais fulan ida-ne’e, to’o dia 31 mak taka nune’e hirak mak iha fulan Juñu ne’e nian,” Komisáriu Alfandega José Abílio informa bá jornalista sira iha kna’ar fatin Liceu, Dili, Kuarta (28/06/2023).

Sasán importasaun sira ne’e, barak liu kona-bá nesesidade bázika tanba Timor-Leste nia dependénsia bá importasaun maka’as loos. Governu banhira book ka hasa’e taxa importasaun oitoan, ema hotu-hotu hakilar dehan folin sa’e.

“Maibé, realidade ita hasa’e ne’e tanba atu trava importasaun. Sé ita-boot sira bá fronteira agora, ita-boot sira haree dehan, tomate de’it mós tama hosi Atambua mai,” Komisáriu José Abílio hateten.

Jornalista: Rogério Pereira Cárceres