Respeita Prezunsaun Inosénsia, Ramos-Horta Fó Posse Membru IX Governu

Hatutan.com, (28 Juñu 2023), Díli—Prezidente Repúblika (PR), José Ramos-Horta sei fó posse ba membru governu hotu ne’ebé Primeiru-Ministru (PM) indijitadu hili no sei respeita ba prezunsaun inosénsia maski membru IX governu balun naran tama iha Tribunál.

Prezidente Repúblika (PR), José Ramos-Horta halo kontinénsia bá Forsa Armada sira iha Aeroportu internasionál Nicolau Lobato, Comoro, hafoin fila hosi vizita Estadu bá Alemaña, Kuarta (28/06/2023). Foto/Elio dos Santos da Costa.

Razaun Prezidente Repúblika sei fó posse tanba povu mak hili Primeiru-Ministru no hetan maioria iha eleisaun Parlamentár 2023. Primeiru-Ministru mesmesak labele, tanba ne’e mak iha governu ida, Primeiru-Ministru iha kompeténsia konstituisionál no legál.

Lee Mós: CNRT-PD Forma IX Governu, Xanana: Tenke Servisu Makas

Razaun seluk tanba Timor-Leste nia sistema polítiku no konstitusionál, Xefe Estadu la hili membru governu, maibé Primeiru-Ministru mak hili.

“Se iha kazu ruma karik iha Tribunál, Primeiru-Ministru rasik hatene la presiza Prezidente Repúblika mak haree fali ida-ne’e,” Ramos-Horta hateten iha Aeroportu internasionál Nicolau Lobato, Comoro, hafoin fila hosi vizita Estadu bá Alemaña, Kuarta (28/06/2023).

“Maski kazu iha Tribunál, ema ne’e seidauk julgadu, seidauk kondenadu, entaun prinsípiu de direitu mak ne’e, Ninguém será considerado culpado até o trânsito em julgado de sentença penal condenatória,” Xefe Estadu subliña.

Deklarasaun Prezidente Repúblika, José Ramos-Horta nian ne’e hodi hatan ba pergunta jornalista sira ne’ebé husu karik lista membru governu IX ne’ebé Primeiru-Ministru indijitadu aprezenta no karik iha balun ne’ebé komete kazu ruma no iha hela Tribunál.

Jornalista: Vito Salvadór