Millaun $300 iha Konta Tezouru Hodi Asegura Despeza Estadu

Hatutan.com, (19 Jullu 2023), Díli- Ministériu Finansas iha osan millaun $300 ne’ebé iha hela konta tezouru hodi asegura dedpezas Estadu nian hein orsamentu Retifikativu ne’ebé kada liña ministeriál halo ona nia submisaun ba iha Ministériu Finansas.

Lee Mós : KHUNTO Sei A-favór bá Programa IX Governu, Husu Halais Polítika Desentralizasaun

Vise-Ministru Finansas, Helder Lopes. Foto/Elio dos Santos da Costa

Vise-Ministru Finansas, Helder Lopes hateten, bazeia bá orsamentu ne’ebé aprova iha Parlamentu Nasionál, Ministériu Finansas halo ona pedidu levantamentu tinan ida-ne’e dala rua; ida mak Rendimentu Sustentável Estimadu (RSE) millaun $400 (MF dada ona), segundu ne’e liu ona husi RSE no tuir lei tenke informa áa Parlamentu Nasionál no depois mak hato’o pedidu bá banku sentrál hodi dada  nia osan husi fundu ne’e para hodi mai finansia despeza Estadu nian.

“Iha levantamentu primeiru no segundu ne’e governu anteriór mak halo no iha Levantamentu segundu ne’e ita halo ona millaun $300 no osan ne’e dada ona no iha ona konta tezouru para bele suporta dispezas hosi governu nian, estadu tomak nian, nune’e bele hatete katak ita iha osan sufisiente iha konta tezouru  hodi asegura dedpezas estadu nian,” Vise-Ministru Finansas, Helder Lopes bá jornalista sira iha Parlamentu Nasionál, Kuarta (19/07/2023).

Preparasaun bá orsamentu Retifikativu, Helder Lopes hateten, hafoin reuniaun iha Ministériu Finansas semana kotuk, Ministériu hotu-hotu hatama ona sira nia submisaun, se karik sira hakarak halo revizaun bá orsamentu orijinál agora ka lae.

Revizaun iha sentidu ida katak keta iha Ministériu balun hakarak halo mudansa ka keta kontribui bá pakote ka espasu fiskál, no mós keta sira husu tan osan ruma karik, sira nia submisaun hatama ona mai Ministériu Finansas no tékniku sira Ministériu Finansas agora dadaun prepara hela.

Molok ne’e Vise-Ministru Finansas mós hateten IX Governu Konstitusionál mantein ho OJE 2023 no sei buka de’it espasu ka buka de’it osan iha billaun $ 2.1 ne’e nia laran, depois mak redistribui medidas foun ka prioridade sira IX Governu Konstitusionál nian, hodi implementa iha 2023 no mós aloka bá estrutura foun Governu nian ne’ebé iha.

Governu halo identifikasaun bá espasu fiskál ne’e re-aloka bá medida no estratéjia sira, inklui orgánika Governu nian foun, kuandu orsamentu ne’e sei liu, dalaruma rezulta bá hamenus tetu orsamentu hosi billaun $2.1 bele tun tán, maibé ida-ne’e konforme ezersísiu ne’ebé halo.

Prioridade sira ne’ebé governu sei tau ba loron 120 sei rezolve problema stoke ai-moruk, kaderneta pasaporte inklui ho normalizasaun bá situasaun dezastre naturál ne’ebé akontese loron hirak liubá no mós buat balun ne’ebé IX Governu Konstitusionál presiza rezolve iha tinan ida-ne’e.

Jornalista: Vito Salvadór