Kazu Omisídiu Agravadu Maina II, PNTL Lautém Detein Ona Suspeitu

Hatutan.com, (28 Jullu 2023), Díli-Polísia Nasionál Timor-Leste (PNTL) liuhosi Komandu Munisípiu Lautém, detein ona suspeitu ho inisiál AN iha sela detensaun, tanba deskonfia sai hanesan autór bá kazu omisídiu agravadu iha Aldeia Codo, Suku Maina II, Postu Administrativu Lospalos, Munisípiu Lautém.

Foto/Foti hosi Google

Kazu omisídiu ne’e akontese iha Kinta, 27 fulan-Jullu 2023), tuku 17:00 Otl, ne’ebé rezulta vítima Bendito Miranda (idade 50) tenke lakon vita (mate) tanba hetan taa ho kro’at hosi suspeitu AN.

“Autór na’in-ida ho inisiál AN (idade 23) agora Polísia detein ona iha sela komandu Munisípiu Lautém,” Komandante PNTL Munisípiu Lautém, Superintendente António Rego Fernandes informa bá Hatutan.com, iha via-telefónika, Sesta (28/07/2023).

Kronolojia akontesimentu ne’e hahú hosi disputa rai ka problema hadau-malu rai entre família. Tanba mosu kontradisaun ideia ho hanoin, ikus mai mosu dezentendimentu to’o rezulta vítima mate fatin.

Prosesu identifikasaun sira hotu Investigadór sira iha Komandu PNTL Munisípiu Lautém halibur hotu ona no tuir oráriu, iha Sábadu, 29 fulan-Jullu ne’e sei remete ka aprezenta autos (prova) sira bá Ministériu Públiku (MP).

Jornalista: Rogério Pereira Cárceres