Kazu Tentativa Omisídiu Samalari, Polísia Detein Suspeitu Na’in-haat

Hatutan.com, (29 Jullu 2023), Díli-Polísia Nasionál Timor-Leste (PNTL) Munisípiu Baucau, kaptura no detein ona suspeitu na’in-haat iha sela detensaun Polísia Eskuadra Baguia tanba deskonfia envolve iha kazu tentativa omisídiu, hodi sona vítima ho inisiál ALR, iha Aldeia Iro-Hoso, Suku Samalari, Postu Administrativu Baguia, Munisípiu Baucau, Kuarta (25/07/2023).

Lee Mós : Kazu Omisídiu Agravadu Maina II, PNTL Lautém Detein Ona Suspeitu

Suspeitu na’in-haat ne’e, ho inisiál CCC, SJMR, MDG no RD, Polísia halo kedan kapturasaun iha loron ne’ebé insidente ne’e mosu.

Foto Ilustrasaun/Google

Komandante PNTL Munisípiu Baucau, Superintendente António Maria De Sá informa kronolojia katak, insidente ne’e mosu bainhira vítima ALR bá partisipa serimónia funeral (hakoi mate) ida iha Samalari. Hakfodak mai, vítima hetan atake hosi suspeitu na’in-haat, rezulta kanek grave, tanba hetan sona ho kro’at (tudik) no mós tuda ho fatuk.

“Motivu ne’e, vítima ho família sira bá hakoi mate-isin ida iha Samalari no fila mai iha área Ira-hoso, entaun, iha grupu ida hosi grupu ida mak asalta. Sira sona iha vítima nia kotuk, kabas nian. Agora daudaun, suspeitu na’in-haat ne’e, ami asegura ona iha sela detensaun Eskuadra Baguia nian,” Komandante António Maria De Sá, informa bá Hatutan.com, Sábadu (29/07/2023).

Komandante António De Sá deskonfia, kazu insidente ne’e envolve hosi membru Grupu Arte Marsiál (GAM), maske nune’e, kazu ne’e rasik sei iha prosesu identifikasaun laran.

Komandante PNTL Munisípiu Baucau ne’e alerta bá lider GAM ho GAR sira atu kontrola ninia membru sira iha territóriu nasionál, hodi evita krime no perturba orden públiku.

Jornalista: Rogério Pereira Cárceres