Embaixada Timor iha Koreia du Súl Rekolla Informasaun Asidente Tráfiku Ne’ebé Rezulta Timoroan Na’in-rua Lakon Vida

Hatutan.com, (31 Jullu 2023), Díli— Embaixada Timor-Leste iha Seoul, Koreia du Súl, rekolla hela informasaun ho parte polísia hodi buka hatene faktu hosi asidente tráfiku ne’ebé rezulta Timoroan na’in-rua mate fatin iha área sidade Metropolitana Daegu, Korea du Súl, Domingu (30/07/2023).

Lee Mós : Mate-isin Traballadór Timoroan Husi Korea Súl To’o Ona Iha Dili

Embaixadór  Timor-Leste bá Koreia du Súl, Gregorio de Sousa, konfirma bá Hatutan.com liu hosi mensajen, Segunda ne’e, katak traballadór Timoroan na’in-tolu mak enfrenta asidente tráfiku no hosi sira-na’in-tolu ne’e, na’in ida kanek todan no na’in-rua seluk mate fatin.

Timoroan na’in-rua ne’ebé lakon vida iha asidente tráfiku iha Sidade Metropolitana Daegu, Korea du Súl, Domingu (30/07/2023). Foto/Foti hosi Facebook

Sira-na’in-rua  ne’ebé Embaixada Timor-Leste nian iha Koreia du Súl konfirma lakon vida ne’e mak ho identidade hanesan Florindo Fátima Araújo hosi Munisípiu Ainaro ho Grasildo Soares da Silva.

“Ida seluk kanek  todan ne’e, ami sei konfirma nia naran iha ospitál. Agora, Embaixada koordena hela ho xefe komunidade Daegu atu buka hatene ospitál ne’ebé rai hela sira na’in-rua nia isin. Ohin duni, staff husi Embaixada sei bá Daegu hodi halo rekonesimentu sira na’in-rua ne’ebé mate,” Embaixadór  Gregorio de Sousa haktuir.

Embaixada Timor-Leste iha Koreia du Súl kontakta mós polísia Daegu hodi buka hatene relatóriu asidente. “Ida né mak ami bele fó informasaun agora. Bainhira staff Embaixada to’o iha terrenu no kontata polísia Daegu, ami sei haruka informasaun ho detallus liután. Abraço,” embaixadór Gregorio de Sousa tenik.

Informasaun seluk ne’ebé Hatutan.com asesu hosi traballadór Timoroan sira iha Koreia du Súl, haktuir timoroan na’in-tolu ne’e ho motór  sai hosi sira-nia hela fatin hale’u tuku 12:50 kalan, atu bá kolega balun nia fatin. To’o iha dalan-klaran, sira-na’in-tolu enfrenta asidente tráfiku hodi rezulta sira na’in-rua mate fatin no na’in-ida kanek todan.

Daudaun ne’e parte sira, liuliu Embaixada Timor-Leste iha Koreia du Súl halo esforsu hodi komunika ho autoridade sira hodi bele hatene loloos motivu no kronolojia hosi asidente tráfiku ne’e.  

Jornalista : Vito Salvadór