Hatutan,com, (01 Agostu 2023), Díli—IX Governu Konstitusionál liuhosi Ministériu Justisa (MJ), deside ona hodi kansela politika atu halo reforma bá Policia Ciêntífica e de Investigação Criminal (PCIC), no konitnua mantéin integra iha Ministru Justisa nia okos.
Desizaun ida-ne’e baze bá Dekretu-Lei n.º 46/2023, ne’ebé Prezidente Repúblika (PR), José Ramos-Horta promulga iha loron 27 fulan Jullu, aprova kona-bá Orgánika IX Governu Konstitusionál nian.
Lee Mós: Governu Halo Duni Reforma Iha PCIC
Iha orgánika Governu nian ne’ebé fó-sai ona iha Jornál Repúblika hatudu katak, PCIC tutela ka rona direta bá Ministériu Justisa, tanba ne’e sei la muda bá iha Polisia Nasionál Timor-Leste (PNTL).
“Iha orgánika Governu nian ne’ebé aprova ona, PCIC iha Ministériu Justisa nia okos, la’ós iha PNTL nia okos. Sei mantein iha ne’e,” Ministru Justisa (MJ), Amandio de Sá Benevídes hateten, hafoin simu vizita kortejia hosi Embaixadór Repúblika Indonézia (RI), Octo Dorinus Manik, iha MJ, Colmera Dili, Tersa (01/08/2023).
Molok ne’e, iha Sábadu (01/07/2023), iha ámbitu serimómia posse bá membru foun IX Governu Konstitusionál nian, iha diskursu Primeiru Ministru (PM), Kay Rala Xanana Gusmão deklara no kompromete katak, iha ninia Governasaun ida-ne’e sei “Reestrutura Policia Ciêntífica e de Investigação Criminál (PCIC), tanba la hatudu liu integridade no profesionalizmu”.
Lee Mós: Prezidente Repúblika Konkorda Reforma PCIC
Jornalista: Rogério Pereira Cárceres
