José Bernardo Soares Mate iha Sela Polísia Sei iha Investigasaun

Hatutan.com, (01 Agostu 2023), Díli—Kazu José Bernardo Soares ne’ebé mate ho tali iha sela detensaun Polísia Munisípiu Díli nian sei iha hela prosesu investigasaun iha Ministériu Públiku (MP).  

Lee Mós : Komandante Jerál PNTL “Taka-Ibun” Bá Prosesu Investigasaun Kazu José Bernardo Mate Iha Sela Caicoli

Matebian José Bernardo. Foto/Ilustrasaun

Prezidente Tribunál Rekursu, Deolindo dos Santos, esklarese katak kazu vítima José Bernardo Soares  ne’ebé mate iha sela PNTL, Caicoli, Díli, kompeténsia iha Ministériu públiku nia liman no fó tutela bá PNTL atu pronunsia kona-bá kazu ne’e.

“Prosesu ne’e agora iha hela investigasaun, agora ita-boot sira husu mai ha’u, ha’u atu dehan saida, tanba ne’e kompeténsia Ministériu Públiku nian, ne’ebé fó tutela bá PNTL atu pronunsia, mais prosesu ne’e seidauk to’o Tribunál,” Prezidente Tribunál Rekursu Deolindo dos Santos haktuir hodi responde jornalista sira iha Palásiu Prezidensiál, Tersa (01/08/2023).

Nia subliña bainhira iha kazu ida mak nia prosesu sseidauk to’o Tribunál ne’e nia labele hatete buat ida, bainhira iha ona Tribunál pelumenus prosesu to’o iha ne’ebé nia bele hatene.

José Bernardo de Jesus Soares, tinan 21, hela iha Audian, Kampu Futeból Díli nia sorin,  lakon vida iha Sela Detensaun Komandu Polísia Munisípiu Díli,  tanba sai suspeitu bá kazu baku-malu ne’ebé rezulta vítima hetan ofensa integridade grave no baixa iha sela ICU Ospitál Nasionál Guido Valadares (HNGV) no ikus mai hakotu iis.

Suspeitu ka vítima mate iha sela detensaun iha tuku 19:0 kalan Otl, 01 Setembru 2022, ho tali tara iha karokok. Hafoin mate, Polísia Munisípiu Díli kontaktu kedan bá família hodi bá haree no akompaña lori bá mortuáriu HNGV hodi hein desizaun bá autópsia.

Lee Mós : PDHJ Kontinua Akompaña Kazu José Bernardo

 Jornalista: Vito Salvadór