Stratacom Global Hosi Brunei Darussalam Hakarak Investe iha Petróleu

Hatutan.com, (07 Agostu 2023), Díli- Ministru Petróleu no Minerais (MPM), Francisco Monteiro, informa empreza Stratacom Global hosi Brunei Darussalam hakarak investe iha área petróleu no minerais iha Timor-Leste.

Ministru Petróleu no Minerais (MPM), Francisco Monteiro kaer-liman ho Managing Director Stratacom Global , Peter Wong. Foto/Vito Salvadór

Ministru Petróleu no Minerais (MPM), Francisco Monteiro hateten ida-ne’e hafoin halo enkontru ho investor bo’ot hosi Brunei Darussalam ne’ebé hakarak mai haree poténsia esplorasaun bá business iha Timor-Leste.

Nia afirma, ho IX Governu Konstitusionál ne’ebé lideradu hosi Primeiru-Ministru Kay Rala Xanana Gusmão, Stratacom Global hatudu sira nia interesse bá investimentu iha Timor-Leste.

“Parte barak ne’ebé sira hakarak foka bá investimentu iha turizmu no área industrial sira iha munisípiu Baucau no mós iha Díli, no seitór ida ne’ebé sira interesse liu atu investe bá mak mina ho gas no mina-rai, tamba ne’e ami ohin ho empreza Stratacom Global hahú halo diskusaun no depois mak sei aprofunda iha futuru,” Francisco Monteiro hateten bá jornalista sira iha edifísiu Ministériu Petróleu no Minerais, Farol, Segunda (07/08/2023).

Nia dehan, Stratacom Global iha interesse bo’ot tebe-tebes, no iha diskusaun inisiais ne’ebé iha bele haree empreza nia kompromisu no tuir mai sei aprofunda ho enkontru tékniku sira iha futuru hodi nune’e bele haree katak saida mak sira bele lori mai, no saida mak Timor-Leste bele fó entermu fasilitasaun ne’ebé  Governu liu husi Ministériu relevante fó dentru  fasilidade legais no regulamentu ne’ebé iha hodi nune’e investor sira bele tau sira-nia investimentu iha tempu tuir mai.

“Ohin ita sidauk ko’alia osan, maibé ne’e investimentu bo’ot ne’ebé kobre área oin-oin, hahú hosi turizmu to’o área petróleu no minerais nian,” Nia sublina.

Embaixadór Timor-Leste bá Brunei Darussalam, Abel Guterres hateten investor hosi empreza Stratacom Global iha intensaun no hakarak atu halo investimentu iha Timor-Leste. Empreza ne’e monstra sira-nia interse no ko’alia ona sira-nia parseria sira seluk atu mai investe iha Timor-Leste.

Nia afirma sira-nia movimentasaun mai Timor-Leste dala-tolu ona no hein hela Governu atu halo aliñamentu bá área sira ne’ebé sira hakarak atu halo investimentu ba ne’e.

“Agora sira prontu no movimentasaun mai Timor-Leste sira halo intensivu no hein deit ita-nia governu para iha aliñamentu para sira bele hahú ho investimentu iha área sira ne’ebé sira atrativu ba,” nia tenik.

Embaixadór ne’e subliña Stratacom Global hanesan empreza nasionál hosi nasaun Brunei Darussalam ne’ebé iha esperiénsia no kualifikasaun diak bá investimentu iha ârea Turizmu, Petróleu no Minerais. Ho ida-ne’e mak empreza ne’e hakarak mós kria oportunidade investimentu iha Timor-Leste hodi fó oportunidade servisu ba Timoroan sira.

Enkontru Ministru Petróleu no Minerais, Francisco Monteiro  ho Managing Director  Stratacom Global, Peter Wong, akompaña hosi Embaixadór Timor-Leste bá Brunei Darussalam Abel Guterres no reprezentante veteranu hosi Conselho Combatentes da Libertação Nasionál (CCLN), Custódio Belo “Alin Laek” no Fernando Gusmão “Bere Du’u”.

Jornalista: Vito Salvadór