CAC Halo Hela Averiguasaun bá Prosessu “Fa’an” Uma Estadu Fulolo

Hatutan.com, (24 Agostu 2023), Díli—Comissão Anti Corrupão (CAC) halo hela averiguasaun bá prossesu “fa’an” uma Estadu ihá área Fulolo, aldeia Sanane, Suku Costa, Sub-Rejiaun Pante Makasar hosi atuál Prezidente Autoridade Rejiaun Administrativa Espesiál Oecusse Ambeno (RAEOA), Arsénio Paixão Bano bá eis Prezidente Autoridade, Mari Bim Amude Alkatiri.

Diretór Investigasaun CAC, José Verdiál.

Diretór Investigasaun CAC, José de Araújo Verdiál hateten, CAC assesu ona informasaun liu hosi publikasaun média kona-bá kazu ne’e, tanba ne’e CAC rejista ona no la’o tuir hela prossesu legál liu hosi averiguasaun antes halo konkluzaun.

Lee Mós: Arsénio Bano “Fa’an” Uma Estadu iha Fulolo bá Alkatiri

“Averiguasaun la’o hela atu buka hatene loloos situasaun ida ne’ebé akontese daudaun. CAC haree hela mekanizmu no prosedur oinsa, kontra prosedimentu ruma no Lei ruma ka la’e,” José de Araújo Verdiál hateten bá Hatutan.com iha serbisu fatin, Faról, Kinta (24/08/23).

CAC liu hosi Diresaun Investigasaun, Unidade Informasaun no Seguransa rejista kedan informasaun sira ne’e no la’ós ema ruma mak mai hato’o keixa tanba informasaun sira ne’ebé CAC assesu ne’e katak, Autoridade fa’an uma Estadu iha RAEOA ba ema balun.

“Tanba ne’e maka ami sei halo hela averiguasaun ka buka-tuir hela verasidade hosi informasaun ne’e,” nia hateten.

Hosi prossesu ida-ne’e mak agora halibur hela informasaun sira hosi informadór sira no koko mós halibur dokumentu balun liga ho ninia regra, Lei sira ne’ebé mak relasiona ho Terras no Propriedade nian.

“CAC ninia investigadór sira agora halo hela ida-ne’e, depois orsida liu hosi prossesu averiguasaun ne’e mak ita hatene katak iha indisius krime ka la’e. Se iha indisius krime, automatikamente ami sei halo kedan auto partisipasaun ba iha Ministériu Públiku,” Diretór Investigasaun ne’e informa bá Hatutan.com.

Durante tinan 2023, iha denunsia kazu ne’ebé CAC investiga hamutuk 63 no relatóriu finál ne’ebé haruka ona bá Ministériu Públiku hamutuk 14. Ida ne’ebé mak agora daudaun sei iha CAC hodi kontinua halo Investigasaun hamutuk kazu 49.

Lee Mós: “Fa’an” Rezidénsia Fulolo, Notariadu RAEAO Konsidera La Prienxe Rekezitu

Lee Mós: Ministru Justisa Konsidera Arsénio Bano “Fa’an” Uma Estadu Fulolo Ne’e illegál

Jornalista Estajiáriu: Lazaro Pereira Quefi