Cambodia Oferese Tan Bolsu Estudu 10 bá Timoroan

Hatutan.com, (29 Agostu 2023), Díli-Primeiru-Ministru Cambodia, Hun Manet promete kontinua fó bolsu estudu bá Timoroan ne’ebé iha prestasaun di’ak, maibé laiha kbiit atu kontinua sira-nia estudu iha nivel ensinu superiór.

Lee Mós: ASEAN Nu’udár Parseiru Boot Hodi Promove Pás no Estabilidade ba Mundu

Primeiru-Ministru Cambodia, Hun Manet simu audensia ho Vise Primeiru-Ministru, Ministru Koordenadór bá Asuntu Ekonómiku, Ministru Turizmu no Ambiente, Francisco Kalbuadi Lay iha sidade kapitál Phonom Penh, Segunda (28/08/2023). Foto/Espesiál

PM Cambodia, Hun Manet haktuir kompromisu ne’e liuhosi sorumutuk ho Vise Primeiru-Ministru, Ministru Koordenadór bá Asuntu Ekonómiku, Ministru Turizmu no Ambiente, Francisco Kalbuadi Lay   iha  sidade kapitál  Phonom Penh, Segunda (28/08/2023).

Francisco Kalbuadi Lay nia prezensa iha kapitál Phnom Penh, tanba simu no hetan konvite husi Primeiru-Ministru, Hun Manet ne’ebé assume kargu hanesan Primeiru Ministru iha loron 01 fulan-Agostu 2023.

“Ha’u simu konvite husi PM Hun Manet ne’ebé foin eleitu nu’udar Primeiru Ministru Cambodia nian. Oportunidade ne’e iha dadersan ha’u hasoru ona Ministru Turizmu inklui Ministra Komérsiu, no loro-kraik ne’e mak hasoru malu ho Primeiru Ministru, Hun Manet no ami ko’alia buat lubuk ida,” Vise Primeiru-Ministru, Ministru Koordenadór bá Asuntu Ekonómiku, Ministru Turizmu no Ambiente, Francisco Kalbuadi Lay informa.

Liuhosi komunikadu imprensa ne’ebé Hatutan.com asesu, Tersa (29/08/2023),  Vise Primeiru-Ministru Francisco Kalbuadi Lay informa mós husi sorumutuk hirak ne’e nia konvida Governante sira husi governasaun Hun Manet atu bele vizita Timor-Leste hodi esplora potensialidade iha área ekonomia, komérsiu, negósiu no indústria nian.

Iha parte sorumutuk ho Primeiru-Ministru, Hun Manet, afirma governu foun Cambodia kontinua tulun Timor-Leste iha área oin-oin to’o Timor-Leste sai full member bá ASEAN.

“Primeiru-Ministru Cambodia mós hateten ona sei kontinua fó bolsu estudu bá Timoroan sira atu mai kontinua sira nia estudu iha nivel superior iha ne’e,” nia esplika.

Francisco Kalbuadi Lay vozita Cambodia dala barak ona, no hahú vizita nasaun ne’e dezde iha tinan 1994 to’o ohin loron. Nune’e nia konsidera, relasaun bilateral entre rai-rua ne’e komesa metin bá daudauk ona, tanba iha lideransa Cambodia nian iha ASEAN mak halo Timor-Leste sai observadór permanente iha organizasaun rejionál ne’e, no oras ne’e kontinua apoiu Timor-Leste iha setor oin-oin to’o sai full member.

Nia esplika, durante pandemia Covid-19 nasaun barak iha mundu inklui nasaun membru ASEAN sira hetan sofrimentu maka’as kona-bá ekonomia tun, maibé Cambodia konsege hakat-liu situasaun ne’e ho di’ak, tanba hafoin pandemia Covid-19 nasaun ne’e hetan rendimentu maka’as iha setor turizmu.

Iha fatin hanesan embaixadór Timor-Leste bá Cambodia, Hermenegildo Kupa Lopes hateten, prezensa Vise Primeiru-Ministru, Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay iha Phnom Penh ne’e pozitivu tebes, tanba Vise PM ne’e iha relasaun di’ak tebes ho Primeiru-Ministru foun Cambodia nian, no mós koñese di’ak rai ne’e kleur tiha ona.

“Pozitivu ida mak Cambodia kontinua fó tan bolsu estudu ba ita nia estudante Timoroan sira atu mai eskola iha ne’e,” Hermenegildo Kupa Lopes haktuir.

Nia hatutan, antes ne’e iha ona estudante Timoroan hamutuk na’in-10 ne’ebé durante ne’e eskola iha Cambodia no besik atu termina ona sira nia estudu.

Jornalista : Vito Salvador