Xanana Orienta Ministériu Tolu Rehabilita Rezidénsia bá Médiku Kubanu

Hatutan.com, (01 Setembru 2023), Díli—Primeiru-Ministru (PM), Kay Rala Xanana Gusmão fó orientasaun bá Ministériu Obras Publika (MOP), Ministériu Planeamentu Investimentu Estratéjiku (MPIE) no Ministériu Saúde (MS), atu halo rehabilitasaun urjénte rezidénsia  bá médiku Kubanu sira, hodi bele hela iha Hospital Nacional Guido Valadares (HNGV), Bidau-Díli.

Primeiru-Ministru (PM), Kay Rala Xanana Gusmão fó orientasaun bá Ministériu Obras Publika (MOP), Ministériu Planeamentu Investimentu Estratéjiku (MPIE) no Ministériu Saúde (MS), atu halo rehabilitasaun urjénte rezidénsia bá médiku Kubanu sira, hodi bele hela iha Hospital Nacional Guido Valadares (HNGV), Bidau-Díli, Sesta (01/09/23). Foto: GPM.

Orientasaun ne’e Xefe Governu fó, hafoin hamutuk ho Ministru Obras Públika (MOP), Samuel Marçal, Ministra Saúde (MS), Elia A. A. dos Reis Amaral no Ministru Planeamentu Investimentu Estratéjiku (MPIE), Gastão Francisco de Sousa, durante hala’o vizita no observasaun direta bá redizénsia médika Kubanu sira ne’e nian, ne’ebé ninia kondisaun fizika hahú aat.

Lee Mós: Xanana Orienta MOP-IGEADI-MSSI Halo Intervensaun no Salva Povu

“Ita presiza hadi’a urjénsia atu fasilita doutór sira bele hela ho di’ak,” Hatutan.com sita komunikadu, Sesta (01/09/23).

Hafoin halo observasaun, Ministru Obras Públika (MOP), Samuel Marçal koordena kedan ho Minstra Saúde Elia Amaral no Ministru Gastão Sousa, hodi halo preparasaun atu rehabilita iha semana ne’e.

Rezidénsia ne’ebé halo komesa tempu Indonézia nian kompostu hosi uma-boot tolu no coby house rua, daudaun ne’e kondisaun fázika hahú aat hanesan, uma nia kakuluk, kalén hahú kuak no plafon dodok hotu ona, inklui morru protesaun ne’ebé halo hale’u uma komesa naksobu.

Jornalista: Rogério Pereira Cárceres