Governu Orienta Servisu Intelijénsia Merkadu Monitoriza Negosiante Ne’ebé Espekula Folin Fos

Hatutan.com, (03 Setembru 2023), Díli—IX Governu Konstitusionál liu hosi Ministru Komérsiu no Indústria (MKI) Nino Pereira ho Vise-Ministru Komérsiu, Augusto Junior Trindade orienta ona tékniku sira iha Ministériu ne’e, liuhosi Servisu Intelejénsia Merkadu iha Diresaun Nasionál Regulasaun Komersiál, atu monitoriza iha kapitál to’o munisípiu liuliu iha área afetada sira atu negosiante sira labele espekula folin fos.

Ministru Komérsiu no Indústria, Nino Pereira ho Vise-Ministru Komérsiu, Augusto Junior Trindade hala’o reuniaun ho importadór fos hodi konklui solusaun bá normalizasaun presu, iha Sala Reuniaun MKI (02/09/2023). Foto: MKI.

Orientasaun ne’e, Ministériu halo tanba Ministru Komérsiu no Indústria (MKI) Nino Pereira ho Vise-Ministru Komérsiu, Augusto Junior Trindade rasik buka hatene loloos ona kona-bá fukun loloos ka kauza loloos hosi folin fos sa’e, liu hosi reuniaun ho importadór fos, iha Sala Reuniaun MKI, Díli, 02 Setembru 2023, hodi konklui solusaun bá normalizasaun presu fos.

Lee Mós: Folin Fos Sai Problema Mundiál, Ramos-Horta Husu Governu Fó Subsídiu bá Povu

“Ministru Komérsiu no Indústria mós orienta ona tékniku sira iha Ministériu Komérsiu no Indústria, liuhusi Servisu Intelejénsia Merkadu iha Diresaun Nasionál Regulasaun Komersiál, hala’o monitoramentu to’o iha munisipiu no área afetada sira hodi hatene loloos situasaun ne’e,” Hatutan.com sita apelu hosi Vise-Ministru Komérsiu, Augusto Junior Trindade iha komunikadu.

Augusto Junior Trindade apela bá negosiante atu labele halo espekulasaun tanba, Ministériu Komérsiu no Indústria liuhosi reuniaun ho importadór sira, hatene loloos ona presu ne’ebé sai hosi importadór sira rasik.  

Ministériu Komérsiu no Indústria hamutuk ho importadór fos sira to’o ona konkluzaun ida no sei aprezenta bá Primeiru-Ministru, Kay Rala Xanana Gusmão hodi solusiona presu fos no assegura stock fos to’o iha fin du anu.

Tuir Augusto Junior Trindade katak, importadór sira apresia inisiativa Governu, liu hosi Ministériu Komérsiu no Indústria, hodi tulun seitór privadu oinsá fasilita importasaun fos, no konsidera seitór privadu nu’udár parseiru esensiál ba dezenvolvimentu ekonomia nasionál.

Durante reuniaun, Augusto Junior Trindade nota katak, importadór sira afirma prontu koopera ho Governu hodi assegura stock fos no normaliza presu iha Timor-Leste.

Reuniaun ne’e partisipa hosi diretór ezekutivu empreza Perisos, Lixun, Alfa Díli no Creative Furak.

Lee Mós: Nasaun Exportadór Sira Mak Hasa’e Folin Fos

Jornalista Estajiáriu: Lazaro Pereira Quefi