Kaderneta Pasaporte 1.000 Sei To’o Uluk TL iha Setembru Nia Rohan

Hatutan.com, (06 Setembru 2023), Díli—Ministru Justisa (MJ), Amândio de Sá Benevides atualiza katak, iha fim fulan Setembru kaderneta passaporte pilotu hamutuk 1.000 sei to’o uluk Timor-Leste (TL) hodi fó atendimentu bá públiku, liuliu sira ne’ebé presiza liu.

Jornalista Hatutan.com Vito Salvador hala’o entrevista ho Ministru Justisa (MJ), Amândio de Sá Benevides.

Oras-ne’e daudaun prosesu produsaun pasaporte hirak ne’e la’o hela, no garante  katak, iha fim de Setembru pasaporte pilotu hirak ne’e iha ona Timor no sei mai kompletu iha iha fulan Outubru.

Lee Mós: Fixu, Fim Setembru Kaderneta Pasaporte 16.000 To’o TL

“Iha kaderneta pasaporte hamutuk 1.000 ne’ebé mak sai hanesan pasaporte pilotu mak sei mai uluk iha fulan Setembru nia rohan atu bele fó ba ema sira ne’ebé nesesita nune’e sira bele halo viajen bá rai li’ur. Husi ne’ebá mak ita bele haree katak pontu de entrada sira husi nasaun sira seluk ne’e simu halo nusa fila-fali mai ho di’ak nune’e ita bele fó órden nune’e bele duplika ninia produsaun hodi bele mai kompletu iha Outubru,” Amândio Amândio de Sá Benevides hateten bá Hatutan.com iha Palásiu Governu, Kuarta (06/09/23).

Razaun halo uluk pasaporte pilotu tanba presiza upgrade nafatin ho kualidade pasaporte ne’ebé antes ne’e Timor-Leste iha ona.

“Presiza halo uluk pilotu tanba presiza duni upgrade nafatin tanba iha primeira jerasaun ita upgrade ona ita nia pasaporte ba seguru liu. Nune’e, iha segunda jerasaun  ita tenke halo seguru liután no forte,” nia esplika.

Tanba ne’e iha konfigurasaun barak iha kaderneta pasaporte ne’e rasik no ne’e presiza komunika bá iha imigrasaun hodi fó bá Embaixada hotu-hotu, nune’e bainhira la’o ba ema nia rai bele hatene katak ne’e mak pasaporte Timor-Leste nian duni.

Lee Mós: Ministru Justisa Semo bá Finlándia Hodi Halo Aprovasaun Finál bá Kaderneta Pasaporte

Jornalista: Vito Salvadór