Presu Kombustível iha Díli Tendénsia Sa’e

Hatutan.com, (23 Setembru 2023), Díli– Loron hirak ikus-ikus ne’e, presu kombustivel (gazolina ho gazóleu) iha Estasaun Kombustivel sira iha Díli laran iha tendénsia sa’e.

Lee Mós: Timor-Leste Enfrenta Tan Kombustivel Mamuk, Negosiante Ambulante Aproveita Hasa’e Folin

Atividade Estasaun Kombustivel balun iha Díli. Foto/Dok. Hatutan.com

Daudaun ne’e presu kombustivel iha estasaun kombustivel sira variavel ka la hanesan. Balun fa’an gazolina ho presu $1,20 sentavu kada litru no balun fali fa’an ona ho folin $1,27 sentavu kada litru. Nune’e mós gazóleu sira iha estasaun kombustivel sira fa’an ho presu variavel entre $1,27 sentavu kada litru to’o $1,35 sentavu kada litru.

Iha Sábadu, 23 Setembru 2023, Hatutan.com halo observasaun bá iha sentru no estasaun kombustível sira balun iha Díli laran atu hatene no haree besik liután kona-bá oinsá balansu entre folin kombustivel sira iha kada estasaun kombustível.

Iha estasaun  Kombustível Aitula Fuels L.da, Belak Fules, 99 Petrol Station, 68 Petrol Station, Pertamina Internasionál Timor SA Bebora, no estasaun Kombustível Esperansa Timor Oan (ETO) hatudu presu kombustivel lahanesan ka variavel.

Tabela presu kombustivel iha Estasaun Kombustivel Neen (6)

Diretor no na’in bá empreza Aitula Fuels Lda, Silveiro Ferreira Maubere bá Hatutan.com  hateten, kombustivel ne’ebé sira fa’an iha sira-nia estasaun kombustivel nia folin depende bá empreza fornesedór boot rua iha Timor-Leste, hanesan ETO ho Pertamina Internasional Timor SA (PITSA).

Nia dehan, bainhira empreza fornesedór  ETO ho PITSA hasa’e kombustivel nia folin maka fó mós  implikasaun bá folin kombustivel iha merkadu nasionál tanba estasaun kombustivel sira sei hasa’e kombustivel nia folin automátika.

Sentru Kombustível Aitula Fuels daudaun ne’e instala ona iha iha Munisípiu Covalima, Bobonaro, Ainaro ho Manufahi.

Jornalista: Rogério Pereira Cárceres