Kay Olok La’ós Asesór Maibé Voluntáriu iha Ministériu Obras Públiku

Hatutan.com, (26 Setembru 2023), Díli- Ministru Obras Públika (MOP), Samuel Marçal, klarifíka katak Kay Olok Sword  Gusmão, la’ós asesór prinsipál iha Ministériu Obras Públiku (MOP), maibé nu’udár voluntáriu hodi buka esperiénsia servisu.

Kay Olok Sword Gusmão partisipa iha enkontru prinsipál sira MOP nian ne’ebé nviral iha Facebook. Foto/Repro

Ministru MOP, Samuel Marçal hateten Kay Olok Sword Gusmão nu’udár oan hosi Primeiru-Ministru (PM), Xanana Gusmão no nu’udár mós timoroan ida iha direitu hanesan sidadaun hotu hodi buka aprende no to’o agora mós Kay Olok seidauk asina kontratu servisu ruma iha MOP tanba nia estatutu hanesan voluntáriu.

“Kay Olo Gusmão laos Timoroan ga?, nia mai iha Ministériu Obra Públika para aprende labele ga?, lei ruma bandu nia labele halo, labele aprende? Sé mak hateten nia asesór prinsipál, Kay Olok iha ne’e MOP hanesan funsionáriu bai-bain, mai aprende, seidauk iha tan kontratu ida bá nia,” Ministru  Samuel Marçal haktuir hodi responde  jornalista sira iha edifísiu MOP, Kaikoli, Díli, Tersa (26/09/2023).

Observasaun públiku ne’ebé iha haree katak Kay Olok durante ne’e sempre akompaña Ministru Samuel Marçal no partisipa iha reuniaun sira Konsellu Administrasaun Fundu Infraestrutura (KAFI) no reuniaun koordenasaun no diskusaun bá Planu MOP ne’ebé envolve dirijente husi Instituisaun tutela no parseiru sira. Ho envolvimentu Kay Olok Gusmão bá iha reuniaun sira ne’e mak hamosu diskusaun públiku kona-bá nia prezensa.

Kay Olok Sword Gusmão nu’udar oan daruak hosi atuál Primeiru-Ministru, Kay Rala Xanana Gusmão ho Kirsty Sword Gusmão, ne’ebé agora kompleta ona idade 21.

Jornalista: Vito Salvadór