Projetu Dada Eletrisidade iha Manufahi ho Kustu $446,000 Paradu

Hatutan.com (26 Setembru 2023), Díli– Reprezentante povu iha Parlamentu Nasionál, Antoninho Doutel Sarmento, kestiona no preokupa projetu distribuisaun liña eletrisidade iha Munisípiu Manufahi ho kustu $446,000-liu ne’ebé paradu hodi prejudika povu hetan asesu bá eletrisidade.

Lee Mós: CAC Submete Bá MP Relatóriu Finál Kazu Projetu Set-top Box RTTL,E.P

Projetu eletrisidade balun iha terrenu. Foto/dok.CAC.

Membru PN hosi Bankada FRETILIN, Antoninho Doutel Sarmento lamenta tebes situasaun ne’e, ho  nune’e liu hosi plenária PN, Tersa   (26/09/2023),  nia husu bá Governu liuhosi Ministeriu Obras Públiku (MOP) ho Eletrisidade Timor-Leste, Empreza Públiku (EDTL,E.P) atu halo supervizaun no buka hatene motivu loloos projetu  distribuisaun liña eletrisidade iha Postu Administrativu Alas, Aldeia Uma-mean, Suku Mahaquidan no mós hosi Aldeia Baria-Laran, Suku Uma-Berloic, Aldeia Alás vila paradu to’o oras ne’e.

“Projetu ida ne’e EDTL,E.P mak nu’udár na’in bá projetu no kotratu ho kompaña rua mak hanesan kompaña Futuru Manoza UNP, Lda ho Ojp Atumbe UNP, Lda, total valór bá orsamentu bá projetu ne’e $446,000-liu,” Deputadu Antoninho Doutel  hateten.

Tuir kontratu ne’ebé estabelese entre parte sira, hanesan EDTL,E.P ho empreza rua ne’e katak durasaun bá implementasaun projetu refere fulan-neen (6) ne’ebé hahu asina  kontratu iha loron 01 fulan-Dezembru 2022.

Dadus ne’ebé aprezenta hosi Deputadu Antoninho Doutel   iha plenária PN katak  iha loron 25 fulan-Janeiru 2023, hahú halo sira nian  servisu, maibé servisu komesa paradu iha fulan-Agostu too agora tanba materiál hanesan besi-rin ka poste eletrisidade nian lato’o ho nune’e traballadór sira tenke husik servisu.

Iha biban ne’e, reprezentante Governu nian ba PN liuhosi  Vise-Ministru Asuntu Parlamentár Áderito Hugo hateten, situasaun  sobre eletrisidade iha Alas, Munisipíu Manufahi sei  hato’o emidiata bá Ministériu Obras Públika (MOP) no Sekretária Estadu Eletrisidade atu bele haree asuntu ne’e hodi fó resposta.

To’o notísia ne’e publika seidauk iha konfirmasaun hosi parte empreza rua ne’ebé Deputadu sira mensiona, hanesan Futuru Manoza UNP, Lda ho Ojp Atumbe UNP, Lda.

Jornalista Estajiária : Zita Menezes