SEII Sei Halo Revizaun bá Lei Kontra Violénsia Doméstika

Hatutan.com, (30 Setembru 2023), Díli-IX Governu Konstitusionál liuhosi Sekretária Estadu bá Igualidade no Inkluzaun (SEII) sei halo revizaun ka hadi’a fila-fali Lei númeru 07/2010, 07 jullu, kona-bá Kontra Violénsia Doméstika tanba konsidera lei ne’e rasik seidauk forte.

Lee Mós: Violénsia Bazeia bá Jéneru, Presiza Mós Lei Protesaun bá Suspeita Sira

Artigu 1 hosi lei kontra violénsia doméstika ne’e esplika, objetu lei ida ne’e estabelese rejíme jurídiku maka bele aplika bá prevensaun violénsia doméstika no mós bá protesaun no asisténsia bá vítima sira hosi violénsia ida ne’e.

Sekretária Estadu bá Igualidade no Inkluzaun (SEII), Elvina Sousa Carvalho. Foto/Elio dos Santos da Costa

Sekretária Estadu bá Igualidade no Inkluzaun (SEII), Elvina Sousa Carvalho, informa, dadaun ne’e, SEII halo hela esforsu maka’as atu implementa planu asaun nasionál violénsia bazeia bá jéneru, halo divulgasaun informasaun kona-bá tipu violénsia saida de’it ka violénsia bazeia bá jenéru sira.

SEII mós iha hela esforsu atu halo revizaun bá lei kontra violénsia domestika nian, no ida ne’e, prosesu revizaun la’o hela, no fiar katak, iha tempu badak SEII bele lori bá Parlamentu Nasionál (PN) liuhosi Komisaun A, trata asuntu sira Konstitusionál nian hodi bele halo revizaun bá lei ne’e.

“Dezde lei ne’e eziste, ita bele dehan, presiza duni halo revizaun tanba rekomendasaun bá halo revizaun sira ne’e mai mós hosi autór justisa, no mós hosi sosiedade tanba dala-ruma lei ladun forte, dala-ruma lei la kobre bá insestu nian, ka kona-bá asuntu sira selseluk, entaun, buat ne’ebé ita bele halo mak, fó solusaun. Solusaun ne’e maka halo revizaun bá lei Kontra Violénsia Doméstika,” Sekretária Estadu, Elvina Sousa Carvalho, hateten, foin lalais ne’e, iha Palásiu Governu, Díli.

Inisiativa atu halo revizaun bá lei ne’e sai prioridade Nonu-Governu Konstitusionál nian, no prosesu konsultasaun la’o ona, grupu traballu ne’ebé maka atu halo servisu bá konsultasaun ne’e mós estabelese ona, esbosu mós iha ona, hein de’it atu avansa.

SEII ninia papél prinsipál maka halo empoderamentu feto iha vida polítika, no empoderamentu iha área ekonómia, no mós SEII asegura katak, kada liña ministerial sira iha ninia orsamentu no programa sira, sempre haree kona-bá perspetiva jenéru ninian no mós asegura orsamentu sensível bá jenéru iha Orsamentu Jerál Estadu (OJE) kada tinan.

 Jornalista: Rogério Pereira Cárceres