Membru PNTL Reformadu Na’in-158 Hahú Hikas Serbisu no Simu Uluk Saláriu Fulan Tolu

Hatutan.com, (09 Outubru 2023), Díli—Komandu Polísia Nasionál Timor-Leste (PNTL) simu hikas membru reformadu na’in-158 ne’ebé molok ne’e tama iha faze apozentasaun bá reforma nian, hahú Segunda 09 Outubru bá oin hala’o fila-fali funsaun polisiál iha instituisaun seguransa ne’e.

Komandante Centro de Formação Policia (CFP), Superintendente Xefe Polísia, Arquimínio Ramos. Foto/Hatutan.com.

Xefe Departamentu Pessoál no Formasaun, Superintendente Xefe Polísia Arquimínio Ramos esplika, reativasaun bá membru na’in-158 ne’e ho baze bá despaixu númeru 446, hosi Komandante Jerál PNTL, Komissáriu Jerál Polísia Henrique da Costa, hodi orienta Komandu pessoál no formasaun atu ezekuta desizaun ida-ne’e.

Lee Mós: Komandu PNTL Aseita Desizaun Governu Reativa Membru Reformadu Na’in-158

“Desziaun Governu nian, liuhosi Konsellu Ministru ne’ebé hasai tiha ona rezolusaun no Komandante Jerál hasai ona despaixu ofisiál númeru 446 atu halo reativasaun. Orienta ona mai ami komandu pessoál no formasaun atu bele akompaña,” Arquimínio Ramos hateten iha Sentru Formasaun Polísia (CFP-Sigla Português), Comoro-Dili, Segunda (09/10/2023).

Arquimínio Ramos mós nemeadu hosi Ministru Interiór, hanesan membru grupu traballu ne’ebé akompaña reativasaun bá sira ne’ebé bá ona apozentasaun iha fulan-tolu liubá no grupu traballu ne’e akompaña atu sira nian prossesu sira ne’ebé sira fila-fali mai hanesan membru ativu Polisia Nasionál Timor-Leste.

Kona-bá kolokasaun fatin servisu bá kada membru hirak ne’e, Komandante Arquimínio Ramos dehan, haktuir bá despaixu Komandante Jerál PNTL nian, katak, sira ne’ebé molok ne’e servisu iha Komandu Jerál, Komandu Munisipiu Dili no Sentru Formasaun Polisia ninian, koloka sira servisu iha Sentru Formasaun Polísia.

Kona-bá kolokasaun ho kargu sira no servisu saida de’it, tuir Lei Orgánika PNTL ninian, kompeténsia iha Komandante Jerál PNTL atu foti desizaun, koloka bá iha ne’ebé de’it. Tanba ne’e, sira ne’e koloka iha CFP atu fó apoiu servisu administrativu sira ne’ebé nesesita iha-ne’e.

Komandante sira ne’ebé iha esperiénsia ne’ebé barak tebes, tánba ne’e presiza duni atu transmite liuhosi formasaun sira bá ninian membru sira.

“Sira ne’ebé komandu unidade, nomós munisipiu sira bá aprezenta sira-nian aan iha komandu ne’ebé sira servisu antes. Iha sentru formasaun ne’e, sira hosi Komandu Jerál, Komandu munisipiu Díli, sentru formasaun ninia ema bá reforma ne’e, sira mak mai konsentra iha ne’e no servisu nafatin iha Sentru formasaun,” Arquimínio Ramos tenik.

Reativa Saláriu

Komandante Pessoál no Formasaun, Arquimínio Ramos hatutan, ho reativasaun servisu bá membru reformadu sira ne’e, komandu mós reativa fila-fali ka normaliza mós sira-ninia saláriu fulan-tolu nian ne’ebé mak durante ne’e la simu, hosi jullu to’o setembru.

“Saláriu nafatin tuir rezolusaun Governu nian ne’e hahú fulan-jullu to’o mai ohin. Ne’ebé, sira-nia saláriu ne’e nafatin. Ita sei komunika ho Institutu Nasionál Seguransa sosiál, hira-hira mak sira simu ona no deskonta ida ne’ebé sira simu ona ne’e. Restu ne’ebé sira sira la simu ne’e, sira simu kompletu. Subsísiu polisiál, alimentasaun sira simu kompletu, hahú hosi fulan-jullu mai to’o setembru,” nia haktuir.

Maske nune’e, bá membru sira ne’ebé mak ho kondisaun moras permanente, sira sei simu de’it saláriu, maibé osan alimentasaun nian labele simu tanba osan ida-ne’e fó, bainhira sira tama servisu.

“Seidauk iha prosesu reforma bá sira katak, sira servisu nafatin. Sira ne’ebé kategória moras permanente, ne’e sira lakon de’it direitu alimentasaun tanba tama serbisu mak han. La tama, ne’e la hetan direitu. Entaun, sira-nia saláriu ne’e mantein nafatin, sira nia subsídiu polisiál ne’e nafatin,” Komandante Arquimínio Ramos, esplika.

Jornalista: Rogério Pereira Cárceres