Tempu Ona Atu Hamoos-Hadi’a Sidade Díli Hosi Lixu no Fahi-Luhan

Hatutan.com, (09 Outubru 2023), Díli—IX Governu Konstitusionál liu hosi Sekretáriu Estadu Assuntu Toponímia no Organizasaun Urbana (SEATOU), ho sériu implementa Dekretu-Lei númeru 33 kona-bá ijiéne órden públiku, envairomentu moos no saudável liu hosi operasaun bá fahi sira ne’ebé komunidade hakiak iha sidade, sobu fahi luhan inklui hamoos valeta ne’ebé intupidu tanba lixu so’e arbiru.

Sekretáriu Estadu Assuntu Toponímia no Organizasaun Urbana, Germano Santa Brites Dias organiza ekipa hodi implementa Dekretu Lei ida-ne’e no husu bá komunidade iha Díli atu hamutuk kontribui implementa iha bairru hotu-hotu iha Díli, liuliu sobu fahi luhan ne’ebé prezudika saúde públika. Foto: SEATOU.

Ho rutinidade, Sekretáriu Estadu Assuntu Toponímia no Organizasaun Urbana, Germano Santa Brites Dias organiza ekipa desde fulan rua ba kotuk hodi implementa Dekretu Lei ida-ne’e no husu bá komunidade iha Díli atu hamutuk kontribui implementa iha bairru hotu-hotu iha Díli.

Lee Mós: AMD Husu Komunidade Ajuda Hamoos Lixu iha Uma-Ninin

“Presiza ita nia kontribusaun ho dixiplina hodi hadi’a sidade Díli sai moos,” Hatutan.com sita Germano Santa Brites Dias ninia lia menon iha komunikadu, bainhira hala’o sosializasaun iha Bair-Pité, foin lalais ne’e.

Germano Santa Brites Dias mós hamutuk ho ekipa operasaun hosi parte Jestaun Merkadu, ekipa eskuadra Dom Aleixo no Administradór Postu Dom Aleixo, Xefe suku no xefe asldeia Bairru-Pité, kontinua sosializasaun bá komunidade ne’ebé uza espasu públiku la tuir órden no Lei.

Liu hosi operasaun konjuntu ne’e, fó hanoin nafatin ba komunidade atu labele hakiak animál hanesan fahi iha sidade Díli, iha komunidade nia uma le’et atu labele fó impaktu dois hodi prezudika moras ba ema seluk liuliu labarik sira.

Apela atu labele okupa espasu públiku hodi harii baraka halo negósiu, labele taka no didin kalén sai to’o trotoár leten, labele so’e foer, rai henek no kualkér sasan iha trotoár  no estrada leten ne’ebé prezudika movimentu no labele taka valeta kuak ka drainazen  halo metin no so’e lixu iha valeta ku’ak  hodi fó impaktu inundasaun iha tempu udan.

SEATOU kontinua informa ba komunidade katak, avizu la’o ona desde fulan Agostu to’o agora atu komunidade kumpre órden no Lei, husu ba Timor oan hotu atu koopera di’ak ho Governu.

“Ha’u mai ko’alia ho imi hosi fuan bá fuan hodi hadi’a sidade Díli hamutuk. Tempu ona atu hadi’a sidade Dili hosi lixu no fahi luhan,” nia hateten.

Durante hala’o operasaun iha aldeia TAT no Hudi-laran, suku Bairru-Pité, ekipa konsege hetan komunidade haki’ak fahi hamutuk 13 no fahi-na’in konkorda atu muda fahi ba fatin do’ok hosi sidade Díli.

Alende ne’e ekipa operasaun liu hosi Guarda Munisipiu Díli halo aprensaun bá sasan balun hosi loja Xineza tanba la kumpri órden ne’ebé antes ne’e aviza ona atu labele fa’an sasan iha loja oin ka liur.

Iha operasaun ne’e identifika katak, komunidade barak mak seidauk tau atensaun didi’ak bá problema lixu, lixu nakonu iha valeta kuak hanesan lixu plástiku, aqua mamuk, kaixa no suratahan no ai-tahan no ai-sanak no komunidade balun taka metin valeta kuak prezudika be’e la hala’i no lixu metin iha valeta laran.

Komunidade haki’ak animál fahi besik valeta no fahi nia fo’er sulin tun ba valeta kuak no problema sira hanesan ne’e presiza hodi tau atensaun makas antes udan monu rai, nune’e bele normaliza lalais be’e dalan no animal fahi tenki muda lalais ba rai hun ka do’ok hosi sidade Díli.

Iha loron 18 Setembru, 2023, Sekretariu Estadu Asuntu Toponímia no Organizasaun Urbana ho Prezidente Autoridade Munisípiu Díli (PAM) ho ekipa tuun bá iha área suku Fatuhada nian hodi sobu  baraka no kios sira ne’ebé harii ilegalmente no konsidera kontra Dekretu-Lei no 33.

Jornalista: Leopoldina de Carvalho