CNRT ho FRETILIN iha Ona Entendimentu bá Kandidatu Komisáriu CAC Ida

Hatutan.com, (10 Outubru 2023), Díli-Bankada CNRT ho Bankada FRETILIN iha ona entendimentu bá kandidatu komisáriu Komisaun Anti Korrupsaun (CAC) na’in-ida atu  hakat bá eleisaun.

Lee Mós: Polémika Eleisaun Komisáriu CAC, CNRT Prefere Governu Komunika Fali ho Bankada FRETILIN

CAC halo buska no apreensaun iha edifísiu gráfika pátria, Lecidere, Tersa (21/12/2021). Foto/Dok.Hatutan.com.

“Ha’u hanoin katak dalabarak ona ita ko’alia hela de’it asuntu ida-ne’e,  prosesu ne’e iha hela no prosesu  entendimentu Bankada rua; CNRT ho FRETILIN halo hela. Ha’u  hanoin pertinente prosesu bá ajendamentu sé maka bele bá,” Xefe Bankada CNRT, Patricíno Fernandes hateten bá jornalista sira iha PN, Tersa (10/10/2023)

Deputadu  Patricíno Fernandes husu pasiensia hodi hein prosesu eleisaun  tanba Curriculum vitae (CV) sei lee iha ne’ebá  ema nia naran ne’e sese sei temi iha ne’ebá, hein akompaña plenária PN.

Iha parte seluk Prezidente Bankada FRETILIN,  Aniceto Guterres hateten, Bankada FRETILIN halo hela observasaun bá situasaun ida-ne’e

“Avansa bá eleisaun ne’e kandidatu ida. Ida-ne’e mak ami hein hela, observa hela situasaun ne’e liu-liu Bankada CNRT tenta hela para oinsá mak kandidatu ida de’it  mak avansa bá votasaun,” Aniceto Guterres haktuir.

Aniceto Guterres afima, bankada boot rua hanesan  CNRT ho FRETILIN  iha tiha ona entendimentu bá kandidatu na’in ida komisáriu Comissão Anti-Corrupcão (CAC).

“Ami  bankada boot rua iha tiha ona entendimentu bá kandidatu ida, sé ami hetan ona entendimentu bá kandidatu ida, ida seluk ne’ebé la hetan  apoiu ne’e di’ak liu retira ne’e maka ami husu, i ha’u hanoin ha’u la presiza temi naran. Parese  Governu retira kandidatu rua ne’e depois avansa ho kandidatu ida de’it, ida ne’e mak ami hein hela,” Aniceto Guterres hateten.

Jornalista Estajiária : Zita Menezes