Xanana Hakarak Hakotu Lalais Problema Fronteira Terrestre TL-Indonézia

Hatutan.com, (12 Outubru 2023), Bali—Primeiru-Ministru (PM),  Kay Rala Xanana Gusmão hakarak atu hakotu lalais problema fronteira Terrestre entre Timor Leste (TL) ho Repúblika Indonézia (RI).

Prezidente Repúblika Indonézia, Joko Widodo simu Primeiru Ministru (PM), Kay Rala Xanana Gusmão hodi partisipa iha Archipelagic and Island State (AIS), iha Otél Samabe, Nusa Dua-Bali, Munisípiu Bandung, Provínsia Bali, Kuarta (11/10/2023). Foto: GPM.

Tanba ne’e maka, Xanana kontinua tau konfiansa totál bá ekipa tékniku sira iha Gabinete Fronteira Marrítima no Terrestre ka Land Maritime Baundaries Office (LMBO) lidera hosi Asistente Espesiál bá Xefe Negosiadór no Xefe ekipa téknika bá negosiasaun nian no ámbitu iha delimitasaun fronteira terrestre RDTL, Roberto Soares no Xefe Gabinete Primeiru-Ministru, Elisabeth Exposto hodi kontinua hala’o diskusaun tékniku ho ekipa Estadu Indonézia nian iha Bali Indonézia.

Lee Mós: Negosiasaun Fronteira Terrestre TL-RI Atinje 90%

“Diskusaun la’o hela, Land Maritime Baundaries Office daudaun iha hela Bali. Ami mai hamutuk no ha’u sei fila-fali bá Timór maibé sira sei kontinua iha Bali hodi hamutuk ho tékniku Indonézia diskute. Tanba ida ne’e kompromisu hosi Governu Indonézia. Ita husu boot hodi hakotu tiha problema fronteira terrestre ne’e, tanba ho Austrália nian mós ita finaliza ona,” Xanana hateten, hafoin partisipa reuniaun AIS Forum, iha Otél Samabe, Nusa Dua-Bali, Munisípiu Bandung, Indonézia, Kinta (12/10/2023).

Xanana dehan, Governu Timor-Leste ho Indonézia sei finaliza diskusaun kona-bá assuntu fronteira terrestre rai rua nian ho espíritu amizade no kooperasaun iha tempu besik nia laran.

Bainhira ekipa tékniku rai rua finaliza diskusaun tékniku  ne’e, sei aprezenta fali bá Estadu rua hodi haree hamutuk atu bele avansa ba assinatura akordu iha Jakarta-Indonézia.

Iha tinan kotuk, atuál Negosiadór Prinsipál Fronteira Marrítima no Terrestre, Kay Rala Xanana Gusmão ho Eis Ministru Koordenadór bá Assuntu Polítiku no Defeza Indonézia Wiranto ho Ministru Negósiu Estranjeiru no Kooperasaun Indonézia, Retno Marsudi asina ona nota aseitasaun ba finalizasaun fronteira terrestre.

Liuhosi assinatura aseitasaun ne’e, konsege konklui fronteira terrestre iha segimentu rua hanesan Noelbesi-Citrana no Bijael Sunan-Oben.

Área Noelbesi-Citrana hanesan fronteira ho Kupang Nusa Tengara Timur (NTT) no Oé-Cusse Ambeno hanesan parte Timor-Leste nian.

Alende ida-ne’e ba área Bijael Sunan-Oben hanesan fronteira Tengah Utara ne’ebé sai parte hosi NTT no Oé-Cusse Ambeno ho medida ektare 142,7.

Jornalista: Rogério Pereira Cárceres