Kandidatu Xefe Suku Submete Dokumentu, Eleitu Sei Simu Subsídiu $250 Kada Fulan

Hatutan.com, (13 Outubru 2023), Díli—Kandidatu Xefe suku sira submete dokumentu iha loron aseitasaun 13 Outubru tinan ne’e, hodi prepara an bá eleisaun suku ne’ebé sei akontese iha 28 Outubru no bainhira eleitu sei hetan subsídiu $250 kada fulan.

Ministru Admistrasaun Estatal (MAE) Tomas do Rosário Cabral. Foto: Tome da Silva.

Ministru Admistrasaun Estatal (MAE) Tomas do Rosário Cabral husu bá públiku atu bainhira iha reklamasaun ruma kona-bá dokumentu sira hosi kandidatu iha kada suku, bele akprezenta to’o orseida kalan, nune’e buka kedan solusaun hodi  bele hamosu fali lista bá kandidatu úniku ne’ebé favorese bá eleisaun suku.

Lee Mós: Xefe Suku-Aldeia Sei La Simu Osan Bainhira La Kontrola Komunidade Tesi Arbiru Kanu Bee-Moos

Tomas do Rosário Cabral observa katak, hosi lista kandidatu ne’ebé barak tebes iha kada suku, signifika komunidade preparadu atu partisipa iha eleisaun lider komunitáriu.

“Governu fó subsídiu bá Xefe suku eleitu $250 kada fulan. La’ós saláriu. Xefe aldeia sira, membru Konsellu suku sira. Sira iha Orsamentu bá sekretariadu nia funsionamentu ne’e ketak,” Tomas Cabral, hateten iha knaar fatin, Caikoli, Díli (13/10/2023).

Brosura eleisaun suku. Foto: Tome da Silva.

MAE esplika, haree bá knaar ka servisu Xefe suku ne’ebé bo’ot tebes maka IX  Governu hamosu Dekretu Lei ida hodi hamosu sekretariadu suku nian, funsionamentu admistrasaun ba suku ho totál  ema na’in-ha’at hanesan sekretária admistrasaun suku, servisu admistrasaun, servisu finansas, servisu assuntu sosiais, nune’e xefe suku no xefe aldeia sira iha liu kbi’it atu kontrola populasaun.

Kona-bá estrutura apoiu Gabinete Konsellu suku sei funsiona iha territóriu nasionál tomak iha tinan 2024.

Tanba ne’e Governu husu ba Konsellu suku tenki ativu atu halo avaliasaun bá atividade suku nian tanba konsellu suku nu’udár Parlamentu ki’ik ida iha suku.

Tuir Lei, kada fulan Konsellu suku tenki halao reuniaun atu bele atualiza kona-bá problema ne’ebé mosu iha suku, hanesan problema ai-han, seguransa, óbitu no mós ema hira mak moris no tenki rejista iha suku.

Lee Mós:Saláriu bá Sekretáriu Administrasaun Suku $170 no Ofissiál Sira $150

Jornalista : Leopoldina de Carvalho