Primeiru Ministru Husu Prezidente Repúblika Reprezenta Estadu TL Iha Simeira Internasionál COP28

Hatutan.com, (26 Outubru 2023), Díli—Primeiru-Ministru (PM), Kay Rala Xanana Gusmão husu Prezidente Repúblika (PR), José Ramos-Horta atu reprezenta estadu Timor-Leste (TL) iha Simeira internasionál Conference Of the Parties (COP28) iha Dubai, ne’ebé sei ko’alia kona-bá assuntu mudansa klimátika iha mundu.

Primeiru Ministru, Kay Rala Xanana Gusmão, hasoru-malu ho Prezidente Repúblika, José Ramos-Horta iha Palásiu Prezidensiál, Aitarak laran Díli, Kinta (26/10/2023). Foto: Elio dos Santos da Costa.

Antes ne’e Prezidente Uniaun Emiradu Árabe (UEA), Mohammed Bin Zayed Al Nahyan liu hosi Embaixadór UEA bá Indonézia Abdullah Salem Aidhaheri konvida Primeiru-Ministru (PM), Kay Rala Xanana Gusmão atu partisipa iha Simeira Internasionál Conference Of the Parties (COP 28) ne’ebé sei ko’alia kona-bá assuntu mudansa klimátika iha mundu.

Lee Mós: UEA Konvida Xanana Partisipa Konferénsia COP28

United Nations Climate Change Conference (UNFCCC) ne’ebé hanaran COP28 sai nu’udár konferénsia mundiál ba mudansa klimátika ne’ebé hala’o kada tinan atu bele halibur péritu sira no ukun-na’in hotu-hotu iha mundu hodi konsolida ideia sira ba mudansa klimátika.

Konferénsia internasionál COP28 ne’ebé sei hala’o iha UEA ne’e hahú hosi loron 30 fulan-Novembru to’o 12 Dezembru tinan ne’e.

“Ha’u ou Primeiru-Ministru, ida tenke bá fali konferénsia internasionál COP28 ne’ebé ko’alia kona-bá meiu ambiente,” José Ramos-Horta hateten iha Palásiu Prezidensiál Nicolau Lobato Bairru-Pité, Kinta (26/10/2023).

Ramos-Hora prefere atu Primeiru-Ministru, Kay Rala Xanana Gusmão mak bá partisipa tanba atu halo desizaun ruma iha konferénsia internasionál ne’e, Xefe Governu mak bele halo kedan buat ruma, maibé bainhira Prezidente Repúblika mak bá bele rona, fó komentáriu maibé labele assina kompromisu ruma.

“Primeiru-Ministru okupadu demais ho Orsamentu Jerál Estadu 2024, entaun Simeira mundiál COP28 iha Dubai ne’e Xefe Governu husu Xefe Estadu mak bá. Entaun konfirma mak ida-ne’e no sei koordena ho Ministériu relevante,” Prezidente Repúblika informa.

Xefe Estadu mós informa katak, Primeiru-Ministru Kay Rala Xanana Gusmão mak sei reprezenta Timor-Leste iha Simeira ASEAN no Japaun iha fulan Dezembru tinan ne’e.

Jornalista: Vito Salvadór