Governu Kompromete Hasai Membru PNTL Sira hosi Grupu Oioin

Hatutan.com, (11 Novembru 2023), Díli-IX Governu Konstitusionál liuhosi Ministériu Interiór, sei hasai membru Polisia Nasional Timor-Leste (PNTL) hosi grupu oioin ne’ebé sira envolve hodi serbí de’t instituisaun, povu no Estadu.

Lee Mós: MI Hatún Despaxu Identifika Membru PNTL Envolve iha GAM-GAR

Ministru Interiór, Francisco da Costa Guterres. Foto/Elio dos Santos da Costa

Ministru Interiór, Francisco da Costa Guterres, dehan, Governu  tenta hela atu konsolida Polísia ho kestaun oioin; Primeiru, revizaun bá sira-nian estatutu hodi bele organiza fila-fali instituisaun PNTL ne’e rasik hodi nune’e bele atribui fali kompeténsia ne’ebé maka tuir konstituisaun atu membru Polísia sira halo servisu ne’e ho di’ak.

“Governu haree, no tenta atu, ami bolu dehan dezvinkula sira ho husik kualker asosiasaun, polítika, ka partidária, ka asosiasaun arte-marsiál, ami tenke dezvinkula tiha sira. Tanba saida? Tanba polísia ne’e, sé ita la dezvinkula, nia halo atuasaun ne’e, konforme ninia apresisaun, ho organizasaun ne’e rasik,” Ministru Interior, Francisco Guterres, hateten, durante partisipa iha programa “meet the press” iha Palásiu Governu, Díli, Sesta (10/11/2023).

“Dala-barak, ita-boot sira hakilar, ooh..polísia mai ida ne’e baku ami, mais polísia la halo buat ida. Tanba iha interese hela. Pure-zemplu, SH (Setia Hati) ho Sete-Sete (77) baku malu. SH mak baku uluk Sete-Sete, mais sé Polisia SH mai mais, mak sala mak ida SH ne’e, mais nia mai purada Sete-Sete to’o dolar didi’ak tanba nia iha asosiasaun mak SH, tanba ne’e Ita tenke dezvinkula,” Francisco da Costa Guterres hateten.

Ministru Interiór ne’e halo tiha ona despaixu bá Komandu Jerál PNTL, atu identifika hotu kedas membru ne’ebé mak asosia, ka vinkula ho asosiasaun sira ne’e hotu, para depois, sira halo formatura ida, atu dezvinkula tiha sira hosi asosiasaun sira ne’e hotu, no sira neutru.

“Sira neutru, para atu bá halo atuasaun ninian. Sé lae, ema barak keixa bebeik. Ooh..ida ne’e mak sala, nusá mak la kaer nian, bá kaer fali ami sira ne’ebé sala. Purke ida sala ne’e, sira ninia maluk, ninia kolega. Sé nia kolega ne’e, nia atu bá kaer halo nusá, sira bolu malu saudara tán. Ida ne’e maka, ha’u hanoin, ami agora dadaun ne’e, buka atu profesionaliza Polísia  liuhosi dezvinkulasaun sira-ne’e hotu ho asosiasaun sira ne’e rasik,” nia esplika.

La to’o de’it iha ne’e, Governu ida ne’e foku haree kona-bá dixiplina. Tenta atu haree reorganiza fali  membru polísia sira nian dixiplina. Haree nia rigór, tanba instituisaun ne’e la’o hela, mais dala-barak ierarkia komandu maka lakon, tanba komandante fó ordém, dala-ruma soldadu sira la kumpri.

Jornalista: Rogério Pereira Cárceres