Projetu Monumentu Memoriál Masakre Santa Krús, MACLN Fó Tempu To’o Dezembru 2023

Hatutan.com, (15 Novembru 2023), Díli– Ministru Asuntu Kombatente no Libertasaun Nasionál, (MACLN, sigla portugés), Gil da Costa Monteiro “Oan Soru” bolu ona kompañia kontraktor Bobolit, Lda atu finaliza projetu konstrusaun Monumentu Memoriál Masakre Santa Krús, 12 Novembru 1991 to’o fulan-Dezembru, tinan ne’e.

Lee Mós: Monumentu Memoriál Santa Krús, Bobolait Laiha Kbiit Fó Fali bá Empreza Seluk

Ministru Asuntu Kombatente no Libertasaun Nasionál, (MACLN, sigla portugés), Gil da Costa Monteiro “Oan Soru” . Foto/Tome da Silva

“Ami bolu tiha ona kompaña, aban bainrua sei rezolve ida-ne’e, ami enkontru para fó orientasaun sé iha buat ruma ne’ebé ladi’ak prontu ami rezolve, rezolve ne’e dalan iha rua de’it, ida la’o bá oin no ida para ne’e de’it,” Ministru Gil da Costa “Oan Soru” hateten hodi responde  jornalista sira iha Palásiu Governu, Kuarta (15/11/2023).

Ministériu MACLN haktuir sira sei haree progresu kompaña Bobolait to’o fulan-Dezembru maka laiha mudansa sira sei foti desizaun bá ida-ne’e

“Ami bolu ona kompaña fó tiha ona avizu bá kompaña para haree nian prosesu to’o fulan-Dezembru 2023, saida maka sei akontese to’o fulan-Dezembru,” Ministru Gil da Costa “Oan Soru”  afirma.

Projetu monumentu Memoriál Santa Krús, 12 Novembru 1991 ne’e ho  nia kustu millaun $1,385,   ne’ebé empreza nasionál Bobolait, Lda hahú ezekuta iha tinan 2021 ho primeiru kontratu ho durasaun tinan ida,  hosi loron 22 fulan-Setembru 2021 to’o loron 22 fulan-Setembru 2022 no períodu kontratu ne’e rasik termina ona.  Maibé, projetu fíziku seidauk termina.

Jornalista Estajiária : Zita Menezes