Bobonaro
Horta Sei Ko’alia ho Xanana Taka Totál Kanek Sira ’75-99′
Hatutan.com, (16 Novembru 2023), Bobonaro-Prezidente Repúblika (PR), José Ramos-Horta, sei ko’alia ho Primeiru-Ministru (PM), Kay Rala Xanana Gusmão, atu taka totál kanek sira mak akontese iha 1974-1975 to’o 1999.
Lee Mós: TL-NTT Hametin Fali Relasaun Kulturál Rai Ida Bandeira Rua
Xefe Estadu José Ramos-Horta, hato’o asuntu ne’e bainhira halo abertura bá semináriu ho tema “interkulturál” iha ámbitu Festival Fronteira 2023, iha salaun Jinájiu Munisipál Maliana, Kinta (16/11/2023).
Prezidente Repúblika, José Ramos-Horta foto ho komunidade sira hosi Timor Osidentál ne’ebé partisipa Festival Fronteira 2023. Foto/Rogério Pereira Cárcerres
“Bá ita timoroan lubuk ida iha NTT iha Indonézia, ne’ebé kleur ona la mai, tanba sira tauk, maibé, ha’u ho determinasaun ko’alia maun-boot Xanana, atu taka duni prosesu hothotu, relasiona ho akontesimentu iha luta narok bá independénsia hosi 1974-1975 to’o 1999,” Xefe Estadu Ramos-Horta hateten bá jornalista sira.
Ramos-Horta, konsidera katak, Festival Fronteira 2023 ne’ebé Governu organiza liuhosi Sekretária Estadu Arte no Kultura (SEAK) ho Centro Nacional Chega! (CNC), importante tebes bá relasaun entre povu Timor-Leste ho Repúblika Indonézia tanba ko’alia kona-bá istória, kultura no rekonsíliasaun ka simu malu.
“Inisiativa hosi Governu, ho Chega! Ho apoiu hosi prezidensias da repúblika, enkontru ida importante tebetebes, koalia kona-bá istória, kultura, rekonsíliasaun, dame, ne’ebé importante tebtebes bá ita, bá Timor-Leste, importante bá ita-nia relasaun ho Indonézia, liu-liu ho provínsia NTT, ne’e mak ha’u mai partisipa,” Prezidente Repúblika, Ramos-Horta, hateten.
Tuir relatóriu Chega! No mós rekomendasaun komisaun habelun malu lia-loos entre Timor-Leste ho Indonézia, husu bá Timor-Leste ho Indonézia, atu haree aspetu kultura nu’udár aspetu ida importante hodi kontínua hametin relasaun entre ema no mós relasaun entre país rua ne’e.
“Ha’u nia prezensa iha ne’e, tane sekretáriu estadu arte no kultura nia inisiativa, hamutuk ho Chega!, no tuir komprimentu implementasaun ho rekomendasaun ne’ebé iha Chega!, para haree took bá oin, hematin dame, rekonsíliasaun ho Timoroan sira hothtou iha rai-laran, no iha rai-liur,” Ramos-Horta afirma.
Jornalista: Rogério Pereira Cárceres