Polítika
Rekruta Funsionáriu Liu 300 La Tuir Prosedimentu, PLP Husu CAC ho PDHJ Investiga MI
Hatutan.com, (20 Novembru 2023), Díli– Xefe Bankada Partidu Libertasaun Populár (PLP), Maria Angelina Sarmento, husu bá Komisaun Anti Korrupsaun (CAC, sigla portugés) ho Provedora Direitu Umanu no Justisa (PDHJ) atu halo investigasaun profunda bá prosesu rekrutamentu funsionáriu kazuál liu na’in-300 iha Ministériu Interiór (MI).
Lee Mós: Deskonfia, Rekrutamentu Funsionáriu Kazuál Ministériu Interiór “Bolu De’it” Kompañeru CNRT
Funsionáriu rekrutadu liu 300 ne’ebé atu destaka iha DNPC-MI tuir formasaun iha Rairobo, Postu Administrativu Atabae, Munisípiu Bobonaro. Foto/Média MI
Liuhosi intervensaun iha plenária Parlamentu Nasionál, Segunda (20/11/2023), Deputada Maria Angelina Sarmento, deskonfia mós rekrutamentu bá funsionáriu kazuál liu-300 atu koloka iha Diresaun Nasionál bá Prevensaun Konflitu (DNPC, sigla portugés) iha Ministériu Interiór ne’e la tuir prosedimentu rekrutamentu ne’ebé aplika tuir Lei Funsaun Públiku ka Estatutu Funsaun Públiku, tanba la halo anunsia públiku.
“Kestaun ligadu ho Ministériu Interior (MI) ne’ebé halo rekrutamentu bá funsionáriu liu 300 atu sai mediadór no rekrutamentu ida-ne’e masál, la hatene rekrutamentu interese atu mantein estabilidade ka lahatene atu hatán bá ezijénsia kampanáriu sira nian, tanba atu sai mediadór ne’e la’ós kualkér ema bele sai mediadór ita presiza ema ne’ebé maka iha esperiénsia duni,” Deputada Maria Angelina Sarmento haktuir iha nia intervensaun.
Deputada Maria Angelina Sarmento mós preokupa ho asesór na’in 24 ne’ebé konsidera barak liu iha órgaun Estadu ida nian.
La’ós ne’e de’t, Deputada Maria Angelina Sarmento mós kestiona asesór na’in-neen (6) ne’ebé destaka iha Sekretáriu Estadu Protesaun Sivíl (SEPS).
“Seraké ida-ne’e ita-boot sira iha osan hodi responde bá ema hirak ne’e,” Deputada Maria Angelina Sarmento kestiona.
Prezidente Parlamentu Nasionál (PPN) Maria Fernanda Lay hatán bá kestaun ne’e haktuir rekrutamentu masál bá Ministériu Interior, Kamara Konta mensiona ona iha nian konta estadu jerál 2021
“Katak rekrutamentu masál deskontrolu, nune’e mós iha komisaun funsaun públika xama atensaun ona asuntu ida-ne’e iha debate horibainhira iha plenária ida-ne’e ne’ebé rekrutamentu deskontrolu ne’e tenke regula duni profisionál bem servisu sa’e maka’as,” Prezidente Parlamentu Nasionál PPN Maria Fernanda Lay hateten.
Jornalista Estajiária : Zita Menezes