Hatutan.com, (21 Novembru 2023), Dili—Konsellu Ministru iha Tersa (21/11/2023), aprova ona proposta Lei Orsamentu Jerál Estadu (OJE) tinan 2024 ne’ebé aprezenta hosi Ministra Finansas (MF), Santina José Rodrigues F. Viegas Cardoso.
Dotasaun orsamentál bá tinan 2024 ho valór totál konsolidadu Billiaun $1,95 ne’ebé sei aloka Administrasaun Sentrál, Rejiaun Administrativa Espsiál Oecusse Ambeno (RAEOA) no Seguransa Sosiál, sein Fundu Rezerva Seguransa Sosiál.
Lee Mós: Ramos-Horta Espera OJE 2024 Fó Mós Prioridade bá Nutrisaun Labarik
Valór ida-ne’e inklui dotasaun millaun rihun $1,83 bá administrasaun sentrál no millaun $60 uza bá RAEOA.
“Hosi kategoria rua ne’e sei millaun $468,8 uza ba saláriu no vensimentu, millaun $386,3 bá bens no servisu, millaun $589,7 bá transferénsias públikas, millaun $34,2 bá kapitál menór no millaun $411 bá kapitál dezenvolvimentu. Orsamentu Seguransa Sosiál, inklui Fundu Rezerva Seguransa Sosiál, iha montante millaun $347,6,” Hatutan.com sita komunikadu.
OJE tinan 2024 prevé ho valór millaun $788,2 bá asuntu ekonómiku, millaun $467,1 bá protesaun sosiál, millaun $140,9 bá edukasaun, millaun $66,2 bá saúde no millaun $45,2 bá abitasaun no infraestruturas koletivas.
Jornalista: Vito Salvadór
