“Oan Soru” Preokupa Jardin Erói Iha Ainaro Ne’ebé Konstrui Hosi Kompañia Betua Calda Unipesoal Lda Seidauk Remata

Hatutan.com, (30 Novembru 2023), Díli—Ministru Assuntu Kombatente Libertasaun Nasionál (MACLN, sigla portugés), Gil da Costa Monteiro “Oan Soru” preokupa ho konstrusaun bá Jardim dos Heróis iha munisípiu Ainaro ne’ebé to’o agora seidauk remata tuir kontratu ne’ebé iha.

Júlio da Conceição “Loro Mesak” bainhira sei assume kargu hanesan Sekretáriu Estadu Assuntu Kombatente Libertadaun Nasionál iha VIII Governu Konstitusionál, hala’o inspesaun bá projetu Konstrusaun Gapura Jardim dos Herois iha Ainaro iha tinan 2022. Kompañia manán-na’in maka Betua Calda Unipesoal Lda, ho nia diretora maka Sekretáriu Estadu ninia kaben. Foto: Espesiál.

Ministru Gil da Costa Monteiro Oan Soru hateten, dezde assume kargu hanesan Ministru Assuntu Kombatente no Libertasaun Nasionál seidauk loke konkursu públiku liu-liu tenderizasaun bá projetu konstrusaun Jardim dos Heróis sira, maibé konstrusaun bá Jardim dos Heróis sira ne’ebé iha maka nafatin no balun konstrusaun para hela maibé Ministériu sei buka-tuir atu hatene no buka solusaun.

Lee Mós: Troka Oan Soru, Loro Mesak Promete Kontinua Verifika Dadus Veteranu

“Ha’u tama mai seidauk loke tenderizasaun foun. Sasan ne’ebé iha, ne’e Governu ida bee liu bá  kotuk ne’e ninian. Ne’ebé ha’u labele hateten buat ida, maibé sei buka-tuir atu hatene tanba saida mak projetu sira ne’ebé iha ne’e parradu,” Oan Soru hateten bá Hatutan.com iha edifísiu Komisaun Funsaun Públiku, Matadouro foin lalais ne’e.

Kona-bá projetu konstrusaun bá Jardim dos Herois iha Ainaro ne’e, Oan Soru dehan, obra hosi Governu anteriór nian iha momentu Sekretáriu Estadu Assuntu Kombatente Libertadaun Nasionál assume hosi Júlio da Conceicao “Loro Mesak”, maibé obra no projetu ne’e seidauk finaliza to’o ohin loron.

“Prossesu sira ne’ebé la’o iha ne’ebá ne’e atividade sira VIII Governu Konstituisional nian. Prosesu sira ne’e nia rohan sira halo hela gapura maibé to’o agora de’it mós seidauk hotu,” nia preokupa.

Governante ne’e mensiona katak, empreza ne’ebé manán projetu bá konstrusaun Jardim dos Heróis Ainaro maka empreza Betua Calda Unipesoal Lda no asina kontratu iha tinan 2021.

Júlio da Conceição “Loro Mesak” bainhira sei assume kargu hanesan Sekretáriu Estadu Assuntu Kombatente Libertadaun Nasionál iha VIII Governu Konstitusionál, hala’o inspesaun bá projetu Konstrusaun Gapura Jardim dos Herois iha Ainaro iha tinan 2022. Kompañia manán-na’in maka Betua Calda Unipesoal Lda, ho nia diretora maka Sekretáriu Estadu ninia kaben. Foto: Espesiál.

Kona-bá preokupasaun ne’e, iha 30 Novembru 2023, Jornalista Hatutan.com konfirma ho Eis Sekretáriu Estadu Assuntu Kombatente Libertadaun Nasionál hanesan más atuál Prezidente Assuntu Veteranu Munisipiu Ainaro, Julio da Conceicao “Loro Mesak” via telefónika, no nia parte husu bá Ministru Assuntu Kombatente Libertadaun Nasionál, Gil da Costa “Oan Soru” atu lalika preokupa tanba konstrusaun bá Jardim dos Herois Gapura Ainaro, hahú la’o normál iha inísiu fulan Fevereiru 2023 no atinje ona 30%.

“Loro Mesak” esplika, projetu Gapura Ainaro nian ne’e assina kontratu iha tinan ida liu b’a kotuk maibé tinan tomak labele hala’o servisu tanba iha momentu ne’ebá iha Jardim nia oin ne’e rasik iha mós projetu konstrusaun estrada.

“Tanba seidauk iha pagamentu bá projetu konstrusaun estrada nian, entaun kompañia ne’ebé halo estrada la autoriza atu tama tanba konstrusaun estrada la’o hela ho razaun katak, ADN seidauk haree. Bainhira karreta boot lori materiál bá halo konstrusaun Projetu Gapura ne’e entaun bele difikulta fali estrada ne’e,” Loro Mesak esplika bá Jornalista Hatutan.com.

Eis Sekretáriu Estadu ne’e hatutan, foin hetan autorizasaun atu tama bá área konstrusaun Gapura ne’e iha Fulan Fevereiru tinan 2023, no agora daudaun servisu konstrusaun la’o normál, la’o di’ak tebes.

Kona-bá pagamentu ne’e iha ona 25% no konstrusaun atinje ona 30%, no oras ne’e servisu iha terrenu la’o hela no tuir nia katak, servisu la’o diak tebes,

Totál orsamentu bá projetu ne’e rasik hamutuk $176.000, maibé kompañia foin halo pagamentu 25%, maibe to’o agora seidauk selu husi Estadu, signifika, kompañia utiliza osan rasik hodi hala’o konstrusaun ba projetu Gapura iha Ainaro.

“Tanba kontratu mate, entaun horisehik Kuarta,29/11/2023 hahú renova, tanba ne’e Segunda ka Tersa mak ami ba hatama, tanba molok loron 6 Dezembru 2023 sistema hahú taka,” nia salienta.

Loro Mesak mós rekoñese katak, loos duni kompañia ho naran Betua Calda Unipesoal Lda mak hanesan manán-na’in bá projetu konstrusaun Gapura ne’e na’in mak nia duni, maibé ninia espoza mak asina kontratu.

“Depois mós bainhira ha’u bá iha Sekretáriu Estadu Assuntu Kombatente Libertasaun Nasionál ne’e kontratu assina antes ona no la’ós ha’u ba tiha mak asina, ne’e la’e. Maibé to’o agora kompañia seidauk hetan pagamentu, ami uza osan rasik,” nia tenik.

Jornalista: Vito Salvadór/Gloria Maia