Austrália Prontu Nafatin Apoia TL Iha Área Defeza

Hatutan.com, (18 Dezembru 2023), Díli—Enkarregádu Negósiu Embaixada Austrália, Caitlin Wilson, hateten Governu Austrália nafatin iha komitmentu bo’ot atu kontinua hametin kooperasaun bilaterál no apoiu Timor-Leste iha área dezenvolvimentu defeza.

Enkarregádu Negósiu Embaixada Austrália, Caitlin Wilson hala’o enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato Bairru-Pité, Segunda (18/12/2023). Foto: PR.

Caitlin Wilson  kontente tebes tanba bele hasoru-malu ho Prezidente Repúblika (PR) José Ramos-Horta hodi diskute no hametin kooperasaun bilaterál entre país rua.

Lee Mós: Austrália Entrega Mákina Harahun Materiál Esplozivu bá PNTL

“Ko’alia kona-bá prossesu formál sira hodi ratifika akordu kooperasaun defeza nian. Ida-ne’e asina hosi ita-nia nasaun rua iha 2022 hamutuk ho nasaun seluk,”  Caitlin Wilson hateten hafoin enkontru ho Prezidente Repúblika iha Palásiu Prezidensiál Nicolau Lobato Bairru-Pité, Segunda (18/12/2023).

Alén de ko’alia kona-bá área defeza nian, diskute mós kona-bá kooperasaun estratéjiku sira ne’ebé bele tulun dezenvolvimentu ekonómiku iha Timor-Leste no kresimentu populasaun nian liu hosi kooperasaun iha seitór Agrikultura no turizmu.

Sorumutu ne’e la ko’alia kona-bá Greater Sunrise, tanba ne’e la’ós parte ida hosi sira-nia diskusaun, enkuantu Austrália nia reprezentante espesiál iha ne’e no semana kotuk halo no foti ona diskusaun oioin ho entidade importante sira iha Timor-Leste.

Jornalista: Vito Salvadór