Kamara Kontas Rekomenda bá Órgaun Estadu Labele Halo Despeza bá Parsela Natal no Festa Natal Hamutuk

Hatutan.com, (22 Dezembru 2023), Díli—Tribunál Rekursu-Kamara Kontas hasai ona notifikasaun ofisiál bá Ministériu Finansas, Diresaun Jerál Tezouru nian  atu haktuir bá órgaun Estadu direta no indireta sira hotu, atu labele halo despeza bá akizisaun cabazes de natal  ka parsela natal nian no mós labele iha realizasaun festa natal hamutuk.

Dokumentu Notifikasuan hosi Diresaun Jerál Tezouru bá órgaun Estadu sira. Foto/Repro

Sita hosi dokumentu notifikasaun hosi Diresaun Jerál Tezouru, Ministériu Finansas, bá órgaun Estadu hotu; direta no indireta, inklui Munisípiu sira ho Rejiaun Administrativu Espesiál Oé-Cusse Ambeno (RAEOA) ne’ebé Hatutan.com asesu, Sesta (22/12/2023), husu atu órgaun sira Estadu nian kumpre implementasaun no rekomendasaun Tribunál Rekursu-Kamara Kontas nian kona-bá la bele realiza no halo despeza ne’ebé laiha kualkér relasaun ho atividade servisu no laiha baze legál, hanesan “aquisição de cabazes de natal no mós realizasaun festa natal.”  

Notifikasaun ne’ebé Diretora Jerál Tezouru,  Regina de Jesus de Sousa, asina ne’e hato’o ona bá responsavel diresaun finansas órgaun servisu no fundu autónoma sira, ho númeru ofísiu 672/GAB/DGT/XII/2023, ho data 20 fulan-Dezembru 2023.

Karta notifikasaun Diresaun Jerál Tezouru nian ne’e mós  kopia bá Ministra Finansas, Santina J.R.F Viegas Cardoso, ho Vise-Ministra Finansas, Felicia Claudinanda Cruz Carvalho.

Jornalista: Rogério Pereira Cárceres