AAF-TL Deklara Aniceto Gouveia Mak iha Direitu Votu Iha Kongressu FFTL, Sei Vota Kalbuadi

Hatutan.com, (27 Dezembru 2023), Díli—Assosiasaun Arbitrajen Futeból de Timor-Leste (AAF-TL) deklara katak, Prezidente Assosiasaun, Aniceto Gouveia mak sei iha direitu votu iha kongressu Federasaun Futeból Timor-Leste (FFTL) no sei depozita konfiansa bá kandidatu Francisco Kalbuadi Lay.

Assosiasaun Arbitrajen Futeból de Timor-Leste (AAF-TL) deklara katak, Prezidente Assosiasaun, Aniceto Gouveia mak sei iha direitu votu iha kongressu Federasaun Futeból Timor-Leste (FFTL) no sei depozita konfiansa bá kandidatu Francisco Kalbuadi Lay, liu hosi konferénsia imprensa ne’ebé hala’o iha sede Assosiasaun Futeból Díli Oeste, Kampung Alor, Kuarta (27/12/2013). Foto: Tomé da Silva.

Deklarasaun ne’e AAFTL hato’o liu hosi konferénsia imprensa ne’ebé hala’o iha sede Assosiasaun Futeból Díli Oeste, Kampung Alor, Kuarta (27/12/2013).

Lee Mós: Francisco Kalbuadi Lay ho Nilton Gusmão Kompete iha Kongresu Estraordináriu FFTL 2024

Deklarasaun ne’e hodi hatan bá polémika ne’ebé mosu iha Komité Eleitorál FFTL iha ne’ebé Prezidente AAF-TL Aniceto Gouveia laiha direitu bá votu tanba iha ona proponente balun hosi interna FFTL ne’ebé sei sai delegadu bá kongressu ordináriu FFTL no laiha koñesimentu hosi Prezidente AAF-TL.

Porta Vós AAFTL, Agrifino de Deus hateten, Assosiasaun Arbitrajen Futeból Timor-Leste, bazeia bá estatuta AAF-TL Artigu 32, ne’ebé ko’alia kona-bá kompeténsia Prezidente Assosiasaun nian, iha alinea 4 hateten ho momoos katak, atu konvoka ka lidera enkontru ruma iha nível AAF-TL ne’e kompeténsia Prezidente assosiasaun nian no Prezidente assosiasaun mós iha kompeténsia atu partisipa reuniaun iha FFTL no nível AFF, AFC, bá to’o iha FIFA.

“Bazeia bá artigu ne’e maka kolega ka membrus arbitrajen sira ne’ebé halo reuniaun iha loron 3 dezembru 2023 no iha loron 15 dezembru 2023 nomeia membru na’in-tolu hodi sai delegadu atu partisipa iha kongressu FFTL ne’e laloos no ami la konkorda tanba reuniaun ne’ebé mak sira hala’o laiha autorizasaun hosi atuál Prezidente Assosiasaun Arbitrajen Timor Leste Aniceto Gouveia,” Porta Vos AAF-TL, Agrifino de Deus hateten.

AAF-TL  haree katak, FFTL kontra no viola ona artigu 32 AAFTL no la tuir ona Estatutu FFTL Artigu 26 tanba iha Artigu 26 hateten momos kedan iha alinea 4 katak kompeténsia atu fó direitu votu Prezidente Assosiasaun Arbitrajen.

“Ho ida-ne’e ami deklara katak ami membru arbitrajen tau fiar nafatin bá Prezidente Assosiasaun Arbitrajen Aniceto Gouveia mak iha direitu votu,” subliña.

AAF-TL Husu mós ba komite Eleitorál atu retira lista naran ne’ebé maka impoen ona iha FFTL tanba lista ne’ebé iha komite Eleitoral AAF-TL konsidera ilegal no la tuir estatutu assosiasaun arbitrajen AAF-TL artigu 32 no Estatutu FFTL artigu 26. Husu komite Eleitorál atu servisu neutru no imparsiál.

“AAF-TL mós deklara ona ami nia apoiu bá kandidatu Francisco Kalbuadi Lay hamutuk ho assosiasaun sanulu resin rua seluk,” nia deklara.

Assosiasaun Arbitrajen Futeból Timor-Leste sira ne’ebé hato’o deklarasaun ne’e maka Assosiasaun Arbitrajen hosi Aileu, Dili Leste, Ermera, Manufahi, Suai, Manatutu, Lospalos, Ainaro, Dili Oeste, RAEOA no Viqueque.

Jornalista: Vito Salvadór