FONGTIL Nota Ministériu 4 La Hatudu Servisu Di’ak

Hatutan.com, (27 Dezembru 2023), Díli– Forum ONG Timor-Leste ka FONGTIL nota katak durante loron 120 servisu IX Governu Konstitusionál nian fó rezultadu balun di’ak, maibé ministériu haat seidauk hatudu servisu másimu atu fó rezultadu di’ak bá povu.

Lee Mós: Eleisaun Órgaun Suku Hatudu Programa Governu Loron 120 Falla

Ministériu haat ne’e mak hanesan Ministériu Justisa (MJ), Ministériu Saúde (MS), Ministériu Administrasaun Estatál (MAE) ho Ministériu Edukasaun (ME).

Diretór Ezekutivu FONGTIL, Valentim da Costa Pinto. Foto/Leopoldina

Diretór Ezekutivu FONGTIL, Valentim da Costa Pinto hateten, saida mak sosiedade sivíl observa, liu-liu ministériu hotu-hotu iha IX Governu konstitusionál hala’o sira-nia knaar iha loron 120 nia laran iha notas lubuk ida ne’ebé  kontinua haree hosi ministériu ida-idak nian, ezemplu hanesan Ministériu Saúde (MS), ne’ebé hateten urjentemente ai-moruk sira ne’ebé tenke iha hodi fasilita   pasiente sira, maibé to’o agora, ai-moruk item balun kuaze iha ospitál no klínika kontinua laiha ka stoke out. Iha mós sira halo, adjudikasaun direita ba kompañia balun ne’ebé atu halo alojamentu, maibé too agora ne’e mós seidauk la’o.

Bá Ministériu Justisa (MJ), tuir notas FONGTIL nian katak iha duni intervensaun depois de ramata loron 120 ne’e,  liuliu kona-bá kaderneta pasaporte, maibé ne’e mós kontinua iha problema barak tanba sei iha ema barak ne’ebé hein hela atu prosesa sira nia dokumentu.

Bá fali Ministériu Edukasaun (ME), FONGTIL haree no simu rasik keixa  profesor  kontratadu sira kontinua ezije sira-nia direitu bá kontinuasaun servisu sira.

“Ami kontinua haree notas lubuk ida iha servisu atendimentu públiku, no buat sira seluk ne’ebé kuaze sira-nia lala’ok ne’e iha, maibé ladún másimu, intervensaun iha terrenu seidauk haree buat ruma, ha’u hanoin ne’e la’ós de’it sosiedade sivíl maka haree maibé povu tomak haree no sente,” Valentim da Costa Pinto hateten hodi responde Hatutan.com iha Díli, Kuarta (27/12/2023).

FONGTIL nota mós Ministériu Administrasaun Estatál (MAE) depois de ramata eleisaun suku, kuaze hamosu de’it dúvida no preokupasaun barak.

“Ami la’ós hateten, durante ne’e sira-nia progresu servisu la’ós laiha, sira halo duni servisu maibé  ne’e kuaze intervensaun administrativu maka barak liu kompara servisu tékniku iha terrenu, hanesan MJ konsege halo intervensaun hatama duni pasaporte balun mai, maibé ida ne’e nia númeru sei limitadu tebes. Ministériu Edukasaun, estatutu bá profesór voluntáriu sira kontinua iha problema tanba ME rasik seidauk deside kona-bá ida-ne’e. Tanba ne’e ami haree, Governu sira esforsu halo servisu maibé ne’e seidauk natoon hodi bele prienxe nesesidade sira ne’ebé ita nia sidadaun sira presiza,”  Valentim da Costa Pinto hateten.

FONGTIL husu bá kada membru Governu hotu, tenke foti lisaun husi programa loron 120, esforsu oinsá bele sai hanesan referénsia, atu nune’e, ezekusaun programa tinan 2024 nian bele mellora ho di’ak liután, liu-liu halo intervensaun bá problema fukun loloos ne’ebé maka populasaun sira enfrenta.

Jornalista: Gloria Maia