Hatutan.com, (27 Dezembru 2023), Díli—Klubu Futeból AD SLB Laulara representa Timor-Leste (TL) bá partisipa iha jogu Timor CUP 2023 ne’ebé hala’o iha nasaun Austrália.
Klubu Futeból AD SLB Laulara representa Timor-Leste (TL) bá partisipa iha jogu Timor CUP 2023 ne’ebé hala’o iha nasaun Austrália, Tersa (26/12/2023). Foto: AD SLB.
Klube Futeból AD SLB Laulara nia jogadór hamutuk na’in-19, Asistente Treinadór-1 ho Ofisiál na’in neen (6) mak arraka ona bá Melborne Austrália hodi reprezenta Timor-Leste iha jogu ne’e, iha Tersa (26/12/2023).
Xefe ekipa Jogadór Klube Futeból AD SLB Laulara, Nivia Reis Silva Caldeira informa, Jogu ne’e rasik sei abertura iha kuarta 27 dezembru ne’ebé partisipa hosi jogadór di’ak hosi klube oin-oin hosi Austrália.
Advertisement
Taxa Timor CUP 2023, nu’udár eventu ne’ebé kada tinan Timoroan sira organiza iha Austrália hodi fahe taxa ba jogadór feto no mane, inklui halo selesaun ba jogadór ho kategoria jogu di’ak sei hetan prémiu oin-oin.
“Ohin ami nia ekipa mane hosi Klube Futeból AD SLB Laulara hamutuk na’in-19, Asistente Treinadór ida hamutuk ho Ofisiál na’in–neen arranka báMelbourne-Austrália hodi partisipa iha jogu Timor Cup,” Hatutan.com sitadeklarasaun Nivia Reis Silva Caldeira iha komunikadu.
Antes arrankas, ekipa jogadór ho ofisiál sira hamutuk ho Embaixadór bá Foin Sa’e ho Diversidade hotu-hotu, Kay Olo Gusmão hala’o enkontru ho Prezidente Klube AD SLB, Laulara, Kay Rala Xanana Gusmão hodi fó mensajen bá sira atu partisipa jogu ne’e ho dixiplina, respeita regras hotu-hotu, hamorin Timor-Leste nia naran iha desportu.
“Prezidente Klube Futeból AD SLB Laulara Kay Rala Xanana Gusmão hato’o ba jogadór sira katak, sira ba hanesan Embaixadór di’ak ida ne’ebé reprezenta Timor-Leste iha jogu Timor Cup.Tanba ne’e, manan ka lakon, nafatin hatudu disiplina hodi aprende esperiénsia hosi jogadór sira ne’ebé mai hosi rai seluk atu bele mai dezenvolve sira nia talentu hodi kontribui bá dezenvolvimentu desportu Futeból iha Timor-Leste,” Xanana hameno.
Molok arranka, ekipa Jogadór sira kontinua rona mós mensajen hosi Treinadór prinsipál AD SLB Laulara Mr King, husu atu jogadór sira joga ho dixiplina no unidade hodi lori ekipa sussesu durante partisipa jogu iha ne’e.
Advertisement
Ekipa Jogadór sira to’o Melborne Austrália sei simu hosi Timoroan sira ne’ebé durante apoia eventu Timor CUP no fó suporta bá Klube AD SLB.