Hatutan.com, (29 Dezembru 2023), Viqueque– Komunidade Aldeia lima (5) hosi Suku Afaloicai, Postu Administrativu Uatulari, Munisípiu Viqueque, daudaun ne’e, la bele asesu bee-moos ho di’ak tanba ema deskoñesidu tesi-kotu tiha kanu distribuisaun bee-moos.
Ema deskoñesidu tesi-kotu kanu distribuisaun bee-moos bá aldeia 5 iha Suku Afaloicai, Viqueque. Foto/Zita Menezes
Komunidade aldeia lima (5) ne’e kompostu hosi Aldeia Bui-Bela, Lena Uatu-Ita, Kailake ho mós Aldeia Kaitau. Anamaria Amaral, nu’udár reprezentante komunidade aldeia 5 ne’e haktuir, deskonfia kanu distribuisaun bee-moos bá aldeia lima ne’e, ema deskoñesidu tesi-kotu iha kalan 24 Dezembru 2023 bainhira akontese problema entre grupu juventude sira.
“Misa kalan 24 Dezembru 2023, sai tiha, ami haree joven sira tiru fogete (petasan), derrepente fatuk komesa tarutu, maibé ami la haree sé maka tuda, liu oras balun de’it, ema deskoñesidu taa-kotu kedan paralon bee-moos nian,” Anamaria Amaral haktuir bá Hatutan.com iha Uatulari, Sesta (29/12/2023).
Advertisement
“Ami nu’udár komunidade hosi Aldeia Bui-Bela, Lena Uatu-Ita, Kailake no mós Kaitau maka sai vitima bá ema deskoñesidu nia atitude aat tesi-kotu tiha kanu distribuisaun bee-moos, ne’ebé ami husu bá nai-ulun sira haree took ami-nia problema ne’e,” Anamaria Amaral hateten.