PNTL Detein Suspeitu Na’in-Tolu Fa’an Fugete bá Minoridade iha Estrada Públiku

Hatutan.com, (29 Dezembru 2023), Díli—Polísia Nasionál Timor-Leste (PNTL) liuhosi operasaun konjunta iha Kuarta (27/12) oras kalan, konsege kaer suspeitu na’in-tolu iha estrada públiku, tanba fa’an fugete bá labarik minoridade sira.

Iha 08 Novembru 2023, PNTL kontrola hela atividade negosiu sasan kontrabandu (Fugetes) ne’ebe ema fa’an no sunu antes selebrasaun loron Natal no tinan foun 2024 tanba halo barullu no prejudika ferik, katuas no labarik sira labele deskansa ho diak iha tempu kalan, konsege asegura fugetes balun ne’ebé tama ilegalmente hosi fronteira. Foto: PNTL.

“Responde bá preokupasaun públiku nian kona-bá sunu fugetes, operasaun ne’ebé lansa hosi diresaun hotu-hotu iha komandu PNTL, ami konsege kaer suspeitu na’in-tolu flagrante delito, bá kazu fugetes nian. Sira fa’an hela iha fatin públiku  bá labarik minoridade sira,” Xefe Departamentu Investigasaun Kriminál Nasionál, Superintendente Polisia João Belo dos Reis, hateten liuhosi konferénsia imprénsa iha Kuartál Jerál PNTL, Caicoli, Kinta (28/12/2023).

Lee Mós: PNTL Hahú Tama-Sai Bairru Halo Operasaun bá Fugetes

Ekipa investigadór sira iha DIK Nasionál halo ona prossesu identifikasaun no investigasaun, daudaun ne’e detein ona suspeitu sira iha sela detensaun Komandu PNTL Munisipiu Díli.

“Hosi na’in-tolu ne’e, ami halo ona prossesu no detein hela iha sela polisia durante oras 72, hafoin bele aprezenta bá Ministériu Públiku,” nia tenik.

Informasaun seluk, Komandu Jerál PNTL liuhosi portavós, husu bá komunidade en-jerál iha territóriu TL laran tomak katak, hela de’it loron rua atu tama bá tinan-foun 2024 nian, husu sidadaun hotu atu selebra loron importante ida-ne’e ho hakmatek, pás, ema ida-idak presiza fó ninia kontribuisaun bá situasaun ne’ebé hakmatek iha rai-laran, liu-liu rai ne’ebé mak Timoroan hotu hadomi tebtebes.

Mensájen hosi PNTL bá públiku mak ne’e, bainhira festeza tinan-foun ida-ne’e tenke ho di’ak, hemu karik, hemu iha fatin ne’ebé mak seguru, labele lori motor ho karreta ne’ebé labele fó risku bá ba vida, risku bá ema seluk ne’ebé mak uza dalan públiku.

Husu nafatin inan-aman atu kontrola oan sira, sunu fugetes karik, sunu iha doeze oras (00:00), dia 31 dezembru, to’o 01:00, dia 01 de janeiru 2024, nune’e labele fó perigu bá ema seluk, tanba bairru-laran, ema balu moras, balun bebé nurak hela, balun mós hakarak toba ho hakmatek.

Jornalista: Rogério Pereira Cárceres