Fiskalizasaun Komisaun F-PN, Sentru Saúde Comoro Sufisiénte Rekursu Umanu ho Estoke Ai-Moruk

Hatutan.com, (17 Janeiru 2024), Díli-Parlamentu Nasionál liohosi Komisaun F ne’ebé trata asuntu Saúde, Seguransa, Sosiál no Igualdade Jéneru, Kuarta (17/01/24), halo fiskalizasaun iha sentru saúde Comoro hodi haree direita kondizaun rekursu umanu,  stoke ai-moruk no prosesu atendimentu bá pasiénte sira.

Lee Mós: Pasiente Mate iha HNGV La’ós Tanba Ai-moruk Laiha no Estoke Mamuk Sempre Bazeia bá Dadus

Pasiente sira halo tratamentu saúde iha Sentru Saúde Comoro, Díli, Kuarta (17/01/2024). Foto/Tome da Silva

Prezidente Komisaun F-PN, Deputada  Maria Gorumali Barreto, hateten iha fiskalizasaun bá Sentru Saúde Comoro ho nia númeru pasiente 144 hatudu prosesu atendimentu di’ak loos ho atentadu profisionál pesoál saúde na’in-140 no  kazuál na’in-sia (9).   

Nia hateten, mezmu pesoál saúde kontratadu na’in-31 ne’ebé sira-nia kontratu termina ona, la prejudika servisu atendimentu iha Sentru Saúde Comoro.

Liga ho estoke ai-moruk iha Sentru Saúde  akontese duni hanesan mós sentru saúde sira seluk iha territóriu nasionál, maibé bazeia bá pedidu estoke ai-moruk nian rezolve daudaun ona.

Dadus rekursu umanu Sentru Saúde Comoro funsionáriu permanente hamutuk na’in-140, kazuál na’in-sia (9) no mós iha kontratadu 85 ne’ebé foin dadaun termina ona kontratu iha loron 31 fulan- Dezembru 2023.

Jornalista Estajiária: Zita Menezes