Posivel, Rogério Lobato Prezidente Autoridade RAEOA no João Mendes Gonçalves Koordenadór Komisaun ZEESM

Hatutan.com, (24 Janeiru 2024), Díli—Daudaun ne’e reuniaun Konsellu Ministru ne’ebé prezide hosi Primeiru-Ministru (PM), Xanana Gusmão, diskute ho kuidadu tebes kandidatu sira atu koloka bá estrutura Autoridade Rejiaun Administrativu Oé-Cusse Ambeno (RAEOA) ho Zona Ekonomia Espesiál Sosiál Merkadu (ZEESM).

Lee Mós: Proposta Alterasaun Lei Kriasaun RAEOA-ZEESM Aprovadu Iha Finál Globál, FRETILIN “Walk Out”

Rogério Tiago Lobato ho João Mendes Gonçalves. Foto/Repro Espesiál

Informasaun ne’ebé Hatutan.com halibur hosi fonte oioin iha Palásiu Governu, Kuarta (24/01/2024), Primeiru-Ministru (PM), Xanana Gusmão aprezenta lista úniku estrutura RAEOA/ZEESM nian ne’ebé kompostu hosi ema na’in-sia (9). Maske nune’e, Konsellu Ministru  kontinua diskute hodi bele hetan proporsionalidade bá emar sira merese bá RAEOA/ZEESM.

Hosi lista úniku ne’ebé Hatutan.com asesu hatudu katak kompozisaun estrutura RAEOA/ZEESM mak hanesan;   

• Rogério Tiago Lobato, prezidente Autoridade RAEOA/ZEESM
• Agustinho Caet, asesór Prezidente Autoridade RAEOA bá asuntu Sosiál   
• Morga de Fátima Ote, Asesór Prezidente Autoridade RAEOA bá asuntu Fortalesimentu Institusionál
• Andre Lao, Sekretáriu Rejionál Administrasaun
• Elvira Manat, Sekretaria Rejionál bá Finansa
• Luis de Jesus Neno, Sekretáriu Rejionál bá Saúde
• Inácia Tamele, Sekretaria Rejionál Edukasaun no Sosiál
• Filomena Sila, Sekretaria Rejionál bá  Agrikultura
• Marcelino M. Coro, Sekretáriu Rejionál bá Terras Propriedade no Rejistu Notariadu
• João Mendes Gonçalves, Koordenadór Komisaun ZEESM

Iha parte ZEESM nian ne’ebé lidera hosi  Koordenadór João Mendes Gonçaves sei hetan apoia hosi nia Vise-Koordenadór na’in-rua (2), kompostu hosi Vise-Koordenadór  Primeiru bá asuntu Polítiku, Régio da Cruz Salu ho Vise-Koordenadór Segundu bá asuntu Dezenvolvimentu Ekonomia Azul no Investimentu, Herculano de Sousa.  

To’o notísia ne’e publika, Konsellu Ministru (KM) kontinua diskute lista naran sira ne’ebé atu koloka iha estrutura RAEOA/ZEESM hodi substitui ka troka prezidente autoridade RAEOA, Arsenio Paixão Bano ho nia estrutura sira.

Jornalista: Lazaro Pereira Quefi